სახელმწიფო უსაფრთხოების სამსახურში გამართული ბრიფინგის დროს, გუშინ გავრცელებულ აუდიოჩანაწერებთან დაკავშირებით ლევან იზორიამ საგანგებო განცხადება გააკეთა.
"გუშინ მედიაში გავრცელდა ყოფილი პრეზიდენტის მიხეილ სააკაშვილის, ნაციონალური მოძრაობის ერთ-ერთი ლიდერის გიგა ბოკერიას და რუსთავი 2-ის გენერალური დირექტორის ნიკა გვარამიას ფარული სატელეფონო ჩანაწერები.
გვსურს საზოგადოებას განვუმარტოთ, რომ სახელმწიფო უსაფრთხოების სამსახურის კონტრდაზვერვის დეპარტამენტის მიერ ჩატარებული ოპერატიული სამძებრო ღონისძიებებისა და მედია საშუალებებში გავრცელებული ინფორმაციის საფუძველზე 24 ოქტომბერს უკვე დაიწყო გამოძიება საქართველოს სისხლის სამართლის კოდექსის 315 მუხლის პირველი ნაწილით, რაც ითვალისწინებს შეთქმულებას სახელმწიფო ხელისუფლების დასამხობად ან ხელში ჩასაგდებად.
როგორც ცნობილია, გამოძიების ფარგლებში შსს-თან თანამშრომლობით უკვე გატარებულია უსაფრთხოების რიგი ღონისძიებები, შესაძლო დანაშაულის პრევენციის მიზნით.
მიმდინარე გამოძიების ფარგლებში, ასევე მოხდება მედიით გავრცელებული ჩანაწერების წარმომავლობისა და ავთენტურობის დადგენა, ჩატარდება ყველა საჭირო საგამოძიებო მოქმედება, დაიკითხება ყველა შესაბამისი პირი, როგორც აღნიშნული ჩანაწერების, ისე ჩვენს ხელთ არსებული ოპერატიული ინფორმაციის გადამოწმების მიზნით," - განაცხადა სახელმწიფო უსაფრთხოების სამსახურის უფროსის მოადგილემ ლევან იზორიამ.
მისივე თქმით, სახელმწიფო უსაფრთხოების სამსახურმა მიმართა უკრაინის შესაბამის უწყებებს სამართლებრივი დახმარებისთვის შესაბამისი ინფორმაციის მოპოვების მიზნით.
"რუსთავი-2"
