"თავისუფლებისა და მხარდაჭერის ცენტრის" ელმძღვანელი ანი ნადარეიშვილი თბილისში მოქმედ სკოლა "ინტელექტთან" დაკავშირებით დამატებით დეტალებს ასაჯაროებს. ეს ის სკოლაა, სადაც გეოგრაფიის სახელმძღვანელოებში აფხაზეთი და სამხრეთ ოსეთი დამოუკიდებელ ქვეყნებად იყო მონიშნული, ხოლო ეს ლიტერატურა "თავისუფალი ზონის" წევრებმა სკოლიდან ამოიღეს და მისი დირექტორისა და პატრულის ეკიპაჟის თვალწინ დაწვეს.
"ყველას გახსოვთ რამდენიმე დღის წინ თავისუფალი ზონის წევრების მიერ კერძო სკოლა „ინტელექტში“ არსებული კრემლის პროპაგანდისტული ლიტერატურის ამოღების და განადგურების ფაქტი. მაშინ ამ ფაქტის ამსახველი ვიდეო კადრები დავდე ჩემს გვერდზე და შეგპირდით, რომ მალე ამ სკოლასთან დაკავშირებით მოგაწვდიდით მეტ ინფორმაციას. და აი ისიც:
სისხლის სამართლის საქმეში „რუსეთის ჯაშუშები vs ბაჩო ახალაია“ ერთ-ერთი ჯაშუში სერგეი გრიგორის ძე ჩაპლიგინია, რომელიც როგორც კი „ქ-ოცნებამ“ ტანჯულის მანტიით გაანთავისუფლა დედა რუსეთში გაიქცა და დღემდე იქ იმყოფება. ჯაშუში ჩაპლიგინი სწორედ ამ ზემოხსენებული სკოლის დირექტორის მოადგილე იყო 2002 წლის სექტემბრიდან 2011 წლის 17 სექტემბრამდე, სანამ მას ქართული სპეცსამსახურები დააკავებდნენ ჯაშუშობის ბრალდებით.
რუსეთის საელჩოს მიერ საკმაოდ დაფასებული ჩაპლიგინი ელჩის მიერ დაჯილდოვდა სიგელით სკოლა „ინტელექტში“ საქმიანობასთან დაკავშირებით. ჯაშუში ჩაპლიგინი 2000 წლამდე ამიერკავკასიაში რუსეთის სამხედრო ოლქის შტაბში ავტოსაგზაო სამსახურის უფროსი იყო, ხოლო 2000 წლიდან იგი პენსიაზე გავიდა. ამის შემდეგ 2001 წელს გაემგზავრა რუსეთის ქალაქ არმავირში, სადაც ერთი წლის განმავლობაში მუშაობდა სამხედრო კომისარიატში. 2002 წელს კი იგი საქართველოში გამოაგზავნეს ჯაშუშის მისიით და კერძო სკოლა „ინტელექტს“ შეაფარეს.
როდესაც თავისუფალი ზონის წევრებმა კრემლის პროპაგანდისტული ლიტერატურა გაანადგურეს, მაშინ ამ სკოლის მოქმედმა დირექტორმა განახორციელა ზარი - „სერგეი გრიგორიევიჩ, ონი ვსიო უნიჩტოჟილი“, სერგეი გრიგორიევიჩი კი უდიდესი ალბათობით სწორედ ის ჯაშუში ჩაპლიგინია, რომელიც დღესაც აფათურებს თავის ბინძურ რუსულ ხელებს საქართველოში", - წერს ანი ნადარეიშვილი.
