"სად არის თქვენი მადლიერება იმისთვის, რაც რუსეთს თქვენთვის გაუკეთებიათ? სად არის მადლიერება იმისთვის, რომ აფხაზებს 15 წლის განმავლობაში თქვენკენ ვუბიძგებდით? თქვენ შავი უმადურობით გადაგვიხადეთ, თქვენ იმით გადაგვიხადეთ, რომ ესროლეთ ჩვენს ბიჭებს, სამშვიდობოებს", - ამბობს რუსი პოლიტოლოგი და დუმის დეპუტატი 2007-2011წწ, პოლიტიკური კვლევების ინსტიტუტის დირექტორი სერგეი მარკოვი.
მისი სიტყვები თომა ჩაგელიშვილის დოკუმენტურ ფილმში "რუსეთის სპეცოპერაცია საქართველოს წინააღმდეგ" არის მოყვანილი. ფილმში აღწერილია, როგორ ცდილობდა 22 წლის განმავლობაში რუსეთი, რომ საქართველო, როგორც სახელმწიფო, არ შემდგარიყო და იქ მუდმივი დესტაბილიზაცია ყოფილიყო.
ფილმში ჩასმულია კიდევ ერთი ყოფილი დეპუტატის კონსტანტინ ზატულინის ინტერვიუს ფრაგმენტები. ერთერთ ფრაგმენტში ის ამბობს, რომ საქართველოს შეცდომა იყო, როცა მან აფხაზეთსა და სამხრეთ ოსეთში სეპარატიზმთან ბრძოლა რუსეთის მსგავსად გადაწყვიტა: "ის, რაც რუსეთმა ძნელად, მაგრამ მაინც გადახარშა ჩეჩნეთში, საქართველოსთვის ძნელად გადასატანი იქნებოდა: რაც რუსეთისთვის სურდოა, საქართველოსთვის ის ლეტალური შედეგია, სასიკვდილო რეცეპტია", - ამბობს ზატულინი.
ფილმი მთავრდება ისტორიკოსისა და ჟურნალისტის დავით გამცემლიძის ინტერვიუს ნაწილით, სადაც ის ამბობს, რომ საქართველოს ჰყავდა სამი პრეზიდენტი, რომელთაგან რუსეთთან საერთო ენის გამონახვა და მასთან ურთიერთობის დათბობა ვერცერთმა ვერ შესძლო. ამის მიზეზად გამცემლიძე რუსეთის ულტიმატუმს ასახელებს და ამბობს, რომ ამ შემთხვევაში საუბარია არა იმაზე, რომ რუსეთს პრობლემას უქმნის ჩვენი საგარეო პოლიტიკა, არამედ იმაზე, რომ მას პრობლემას უქმნის საქართველოს, როგორც დამოუკიდებელი, სტაბილური ქვეყნის არსებობაც. ამიტომ ის ყველაფერს აკეთებდა და გააკეთებს იმისთვის, რომ თუ ვერ გააუქმებს საქართველოს დამოუკიდებლობას, მუდმივი დესტაბილიზაციის პირობებში ამყოფოს ეს ქვეყანა.
"ვერცერთმა პრეზიდენტმა ვერ გამონახა საერთო ენა და ვერ ერთი მომავალი ვერ გამონახავს მას რუსეთთან, თუ არ მიიღებს მის ულტიმატუმს, რომ საქართველოს განვითარება უნდა იყოს მისი რუსეთთან ინტეგრაციის ფუნქცია და არა პირიქით", - ამბობს დავით გამცემლიძე.
ვიდეო: ფრაგმენტი (ბოლო მონაკვეთი) თომა ჩაგელიშვილის ფილმიდან "რუსეთის სპეცოპერაცია საქართველოს წინააღმდეგ", "რუსთავი-2".
