2015-07-16 03:20

ზაზა ბიბილაშვილი „ფეისბუქში“ წერს, რომ ბოლო დროს „ქართული ოცნების“ მხარდამჭერებიდან ხელისუფლების თანადგომას მხოლოდ „ყველაზე ბნელები და სინდისზეხელაღებულები“ გამოხატავენ, დანარჩენები კი „შუაშისტობენ“:

„ქოცობა იმდენად ტეხავს, რომ ხელისუფლების მხარდაჭერას მხოლოდ ყველაზე ბნელები და სინდისზეხელაღებულები აღიარებენ. ნაღდი, ტანსაცმლიანი ქოცები (აი, ისინი, ივანიშვილი რო "არ მოსწონთ", უბრალოდ, სააკაშვილს რომ "ურჩევნიათ"), ახლა შუაშისტობაზე დებენ თავს.

აქა-იქ შეიძლება უწყლობაზე ან უშუქობაზეც დაიწუწუნონ (ოღონდ, აუცილებლად კერძო კომპანიებს მოედავებიან - აბა, მთავრობა რა შუაშია?), მაგრამ მთლიანობაში, კომფორტში არიან: ქე მაინც "ტერორი" აღარაა - მკვლელებს ისევ პატივისცემით ექცევიან ციხეში (თუ დაიჭირეს), ყოფილ მექრთამეებსაც აღარავინ ედავება უკანონოდ დათრეულ ქონებას.

ნუ, მოწმეებს კი აწამებენ და კლავენ პოლიტიკური მიზნებით, შეკვეთილი მკვლელობებიც აღდგა, კრიმინალიც დაბრუნდა, ეკონომიკურადაც ჩავისვარეთ, ნეპოტიზმი და კორუფცია ყვავის, მაგრამ ეს მაინც "სხვაა"... მოკლედ, ბაჯაღლო ქოცი დღეს შუაშისტობს და ამტკიცებს, მე საერთოდ არ წავსულვარ არჩევნებზე ან, წავედი და ყველა გადავხაზეო...

კეთილსინდისიერ შუაშისტს (ასეთი, სამწუხაროდ, ცოტაა) დღეს ნაცი ჰქვია (აბა, სხვანაირად როგორ შეიძლება საღ აზრს გამოთქვამდე ან ისბრძენიკაცი არ მოგწონდეს?), თავად ნაცები კი ქოცისთვის ერთი მხრივ "პრაქტიკულად აღარ არსებობენ", მეორე მხრივ კი "სექტაა" - სექტა, რომლის წევრებმაც იციან წერა-კითხვა, "ინგლისური და კომპიუტერი," ჰყავთ ძალიან დიდი საერთაშორისო "მეგობართა კლუბი" და აკონტროლებენ თითქმის ყველაფერს მსოფლიოში, ერთმორწმუნე რუსეთის გარდა.

სექტა, რომელიც სადარბაზოებში შპრიცებს ყრის, საოკუპაციო ზოლზე რუსულ ნიშნებს ამონტაჟებს, აუფასურებს ლარს, ხელისუფლების წარმატებული პოლიტიკის და ტიტანური ძალისხმევის მიუხედავად, არ ცვლის რიტორიკას, რითიც აფრთხობს ინვესტორებს და ანგრევს 9 წლის მანძილზე დანგრეულ და რისვაივაგლახით "სტრუქტურულად გაჯანსაღებულ" ეკონომიკას...

ხოდა, ამ ყველაფრის ფონზე, მგონი აშკარაა, რომ იმ თაღლითს ის 7 მილიარდი ბოლო კაპეიკამდე რო ჩამოვართვათ, მაინც არ იქნება ჩვენი საშველი. აგერ, საბერძნეთმა 400 მილიარდი მიიღო და რა? პრობლემა სხვაგანაა...“, - წერს ზაზა ბიბილაშვილი.