„სპუტნიკის“ ცნობით, ცხინვალის დე ფაქტო ხელისუფლებამ გაავრცელა განცხადება, რომ 14 ივლისს ცხინვალის ქუჩებში სამხედრო ტექნიკის გადაადგილება უკავშირდება არა ე.წ. საზღვარზე სიტუაციის გამწვავებას, არამედ რუსულ სამხედრო ბაზებში სწავლების დაწყებას.
ამასთან, ე.წ. საგარეო უწყების მიერ გაკეთებულ განცხადებაში აღნიშნულია, რომ სამშაბათს, დაუდგენელმა პირებმა „დაარღვიეს სახელმწიფო საზღვარი ორ ქვეყანას შორის“ და დააზიანეს საინფორმაციო დაფები, რომლებიც მესაზღვრეებმა „რესპუბლიკის საზღვრის გავლების მიზნით დაწყებული გეგმიური სამუშაოების დროს“ დადგეს.
„სპუტნიკი“ წერს, რომ ოსურმა მხარემ თხოვნით მიმართა საქართველოში ევროკავშირის დამკვირვებელთა მისიას და ერგნეთის შეხვედრის ჩატარება მოითხოვა, სადაც ამ დღეებში საკითხს განიხილავენ.
„სპუტნიკის“ სტატიაში, ე.წ. სამხრეთ ოსეთის ხელისუფლებაზე დაყრდნობით მითითებულია, რომ „უშიშროების სახელმწიფო კომიტეტის სასაზღვრო სამსახურმა 1 ივლისიდან განაახლა საინფორმაციო დაფების (მანიშნებლების) აღდგენის გეგმიური სამუშაოები. თუმცა, დაუდგენელმა პირებმა საღებავით გადაფარეს ერთი საინფორმაციო მანიშნებელი, ხოლო მეორე მოთხარეს და ხევში გადააგდეს. ყველა მაჩვენებელი განთავსებულია 50-100 მეტრით წინ იმ ხაზამდე, სადაც გადის სამხრეთ ოსეთის რესპუბლიკის სახელმწიფო საზღვარი“.
შეგახსენებთ, რომ 2015 წლის 15 ივლისს ინგუშეთში, ჩეჩნეთში, დაღესტანში, ჩრდილოეთ ოსეთსა და ე.წ. სამხრეთ ოსეთში მდებარე რუსულ ბაზებზე არტილერისტთა მასშტაბური სწავლება დაიწყო.
