2015-06-07 23:13

ოდესელები წერენ, რომ შაბათს, დილიდან ოდესის ადმინისტრაციის ახალი ხელმძღვანელი მიხეილ სააკაშვილი ოდესის ცნობილ ბაზარ "პრივოზში" იმყოფებოდა და დახლებს შორის დასეირნობდა, რამაც პოლიციელები და კონტრაბანდისტები შოკში ჩააგდო.

ოდესელი ინტერნეტმომხმარებლები წერენ, რომ სააკაშვილი მარტო იყო და გზადაგზა პოლიციას განკარგულებებსაც აძლევდა. ცნობილია, რომ ბაზარი "პრივოზი" ოდესაში კონტრაბანდული სიგარეტის გასაღების ერთერთი უმსხვილესი პუნქტია. იქ კონტრაბანდული სიგარეტის გამყიდველებისთვის სპეციალური დახლები არსებობს, რომლებსაც არავინ ეხება. 

იმის გათვალისწინებით, რომ კონტრაბანდული სიგარეტის თემა სააკაშვილმა და მისმა გუნდმა საქართველოში მცირე დროის განმავლობაში, თუმცა, მკაცრი და გადამჭრელი ზომების მიღების შემდეგ გადაჭრა, გამორიცხული არ არის, ოდესის ოლქშიც სწორედ ეს თემა გახდეს ერთ-ერთი პოპულარული. საქართველოში კონტრაბანდული სიგარეტი, ძირითადად, ოკუპირებული აფხაზეთიდან შემოდიოდა და ცხადია, ბიუჯეტი უდიდეს შემოსავალს კარგავდა, რადგან უაქციზო სიგარეტი შედარებით იაფი იყო.

მაშინ ფინანსთა სამინისტროსთან საგადასახადო ინსპექცია შეიქმნა, რომელსაც იარაღის გამოყენების უფლება, ასევე, კონტრაბანდისტების დაკავების უფლება მიეცა. ეს იმით იყო განპირობებული, რომ სიგარეტის კონტრაბანდაში ჩაფლული იყვნენ ე.წ. პარტიზანული შენაერთებიც, ამას გარდა, უკანანო აფხაზური ბანდფორმირებები. რეფორმა მძიმედ, მაგრამ მაინც გაგრძელდა და საბოლოოდ, კონტრაბანდული სიგარეტის შემოტანა ოკუპირებული ტერიტორიიდან შეწყდა.

მიხეილ სააკაშვილმა "ფეისბუქის" გვერდზე დაანონსა, რომ პრიორიტეტები და ოდესის ოლქში გადასადგმელი პირველი ნაბიჯები ორშაბათს გახდება ცნობილი. მანამდე მან ექსპერტებთან ხანგრძლივი თათბირი გამართა. ცნობილია, რომ თათბირის მსვლელობაში მონაწილეობა მიიღეს ცნობილმა უკრაინელმა აქტივსიტმა და "მაიდნის" მხარდამჭერმა იულია მარუშევსკაიამ და ჟურნალ "Forbes Украина"-ს რედაქტორმა ვლადიმირ ფედორინმა. 

"ოდესა ლაიფისა" და სოცქსელების მიხედვით მოამზადა ლაშა ბერულავამ