მიხეილ სააკაშვილი აცხადებს, რომ თანამებრძოლების მიტოვებას და ქართულ პოლიტიკაში აქტიურობაზე უარის თქმას არ აპირებს და ექნება თუ არა ქვეყნის მოქალაქეობა, ამაში გადამწყვეტ როლს ვერ ითამაშებს.
„პოსტსკრიპტუმთან“ ინტერვიუში საქართველოს მესამე პრეზიდენტი და ოდესის ოლქის გუბერნატორი აცხადებს, რომ არ აპირებს, საქართველოს ხელისუფლებას სამუშაო გაუიოლოს და მოქალაქეობის შეჩერება მოითხოვოს:
„უკრაინის კანონმდებლობით მე მაქვს გარდამავალი ორწლიანი პერიოდი, რა პერიოდის განმავლობაშიც შემიძლია ვიყო საქართველოს მოქალაქეც. თუ ისინი შემიჩერებენ მოქალაქეობას (მე ნამდვილად არ მივმართავ, რომ შემიჩერონ), არც ეს იქნება დამაბრკოლებელი გარემოება.
კიდევ ერთხელ მინდა შევახსენო ყველას, რომ საქართველოს მოქალაქეობა რასაც ახლა მაძლევს, ესაა ექვსი კვადრატული მეტრი მატროსოვზე, ისევე, როგორც ჩემს მეგობრებს. თუ ვინმე თვილის, რომ მე ეს შესაძლებლობა უნდა გამეცვალა იმ შესაძლებლობაზე, რომ საერთო საქმე, უკრაინის საქმე და ევროპის საქმე ვაკეთო აქ, არ ვეთანხმები და მათგან ვერც შენიშვნებს მივიღებ.
რაც შეეხება ფორმალიზებას, ამასზე მერე ვილაპარაკოთ, თუ მოქალაქეობა შემიჩერეს, ეს არაა გადამწყვეტი ფაქტორი. რა, ივანიშვილი რომ დარბოდა მიტინგებზე 2012 წელს და შუშის იქედან მოგვმართავდა, გვმოძღვრავდა, ვინმემ იკითხა, მოქალაქე თუ არისო? ხომ არ ავიწყდებათ, თვითონ როგორ მოვიდნენ?“, - განაცხადა მიხეილ სააკაშვილმა.
შეგახსენებთ, საქართველოს კანონმდებლობით ორმაგი მოქალაქეობა აკრძალულია, ხოლო იმ შემთხვევაში, თუ საქართველოს მოქალაქე მიიღებს რომელიმე სხვა ქვეყნის მოქალაქეობას, ის ავტომატურად კარგავს საქართველოს მოქალაქეობას. საქართველოს პრეზიდენტს შეუძლია, გამონაკლისის სახით, ორმაგი მოქალაქეობის უფლება მისცეს პირებს, რომლებსაც განსაკუთრებული დამსახურება აქვთ სახელმწიფოს წინაშე.
