2015-05-14 21:50

ახალი სპორტის სასახლის დასრულება თავიდანვე დადგენილ და განსაზღვრულ ვადებში ვერ ესწრება, ამიტომ ხელბურთის ტურნირი სპორტის სასახლეში ჩატარდება და იქ გამწესებულ სახეობებს ჩაანაცვლებს. ამის შესახებ "sportall.ge" წერს. 

"თბილისი-2015"-ის მასპინძელი ბაზების სიაში ცვლილებაა - კანდიდატებიდან ამოვარდა ხელბურთის დარბაზად წოდებული სპორტის კომპლექსური სასახლე, რომელიც საბურთალოს სასაფლაოს ტერიტორიაზე შენდებოდა. მას ხელბურთის ტურნირისთვის უნდა ემასპინძლა, თუმცა მშენებლობა მეტისმეტად გვიან დაიწყო და ეს ცვლილებაც ამან გამოიწვია. 

მართალია, მშენებარე კომპანია ახლაც იძლევა გარანტიას, რომ შენობას დათქმულ ვადებში ჩააბარებს, მაგრამ საორგანიზაციო კომიტეტმა არ გარისკა და სათადარიგო ვარიანტზე გადაერთო.

მხოლოდ დასრულებაც ბევრს არაფერს ნიშნავს (თუმცა საკითხავია, ასე ნაჩქარევად აშენებულის ხარისხიც რამდენად სანდო იქნება), რადგან შენობის შიდა ინტერიერის კეთილმოწყობასაც დიდი დრო უნდა და რაც მთავარია, დასამონტაჟებელია თანამედროვე აპარატურა და ელექტროსისტემა, ჩასატარებელია სატესტო შეჯიბრება... 

შეგახსენებთ, რომ სპორტის სასახლის მშენებლობის თემა დაპირისპირების ერთერთი დეტალი იყო სპორტის მინისტრ ლევან ყიფიანთან მიმართებაში იმ პრეტენზიებიდან, რასაც მას პარლამენტის წევრები უყენებდნენ. აზრთა სხვადასხვაობას იწვევდა სპორტის ახალი სასახლის მდებარეობაც, კერძოდ ის, რომ სასახლე სამი მხრიდან სასაფლაოებით იქნება გარემოცული, რაც, დეპუტატების აზრით, ცუდად იმოქმედებს სპორტსმენების განწყობაზე.