საპარლამენტო უმრავლესობის ლიდერმა დავით საგანელიძემ უმცირესობის დეპუტატები გააკრიტიკა და მათი რეპლიკა გააპროტესტა.
„აი, ამ სექტორიდან, არ მინდა, შემეშალოს და გვარს არ დავასახელებ, რომელიღაცამ ისროლა რეპლიკა, თქვენ იმ ფულს ხარჯავთ, რომელიც ევროკავშირისგან ჩვენ მოვიპოვეთო...
რას ეძახით თქვენ მოპოვებულს? ომი რომ იყო და თქვენი და ჩვენი ძმები რომ დაიხოცნენ, ოჯახები რომ გაუბედურდა და ამის შედეგად იყვნენ დევნილები? ამას ეძახით მოპოვებულს, იმ მილიარდებს? მერე სად წაიღეთ, ეს ცალკე საკითხია კიდევ, მაგრამ მოპოვებულს ხომ ეძახით? რაც თქვენ მიწები დაკარგეთ, ჩვენ დავიბრუნებთ, ეს მთავრობა და ეს უმრავლესობა დაიბრუნებს, მაგრამ ის მოპოვებული არ იქნება...
აი, ჩვენ მალე შევხვდებით ყველანი გარიჟრაჟს, ჩემთვის გარიჟრაჟი უკვე იყო 2012 წლის ოქტომბერში. იმის მერე კიდევ უფრო წინ ვართ წასული. მე დარწმუნებული ვარ, ამ მთავრობას ექნება ლეგიტიმაცია იმისთვის, რომ ერთად ავასრულოთ ის დანაპირები, რაც ხალხს მივეცით“, - განაცხადა დავით საგანელიძემ.
