2015-04-24 19:46

მინისტრის შეცვლას 11 დეპუტატი ელოდება. სპორტისა და ახალგაზრდობის კომიტეტს ლევან ყიფიანის უწყების საქმიანობაზე კრიტიკული დასკვნის პრემიერისთვის გადაგზავნის შემდეგ პასუხი არ მიუღია.

სპორტის პოლიტიკის განსაზღვრა, ჭიდაობის ფედერაციასთან დაპირისპირება, ოლიმპიადისთვის განკუთვნილი მშენებარე ობიექტი და ტენდერები- ეს ის საკითხებია, რომლის გამოც მმართველ გუნდს მინისტრთან პრეტენზიები აქვს.

კომიტეტის წევრთა ნაწილი ცოტა ხნის წინ ყოფილ პრემიერსაც შეხვდა. თუმცა მათი მტკიცებით, საკითხი სპორტის მინისტრის მიმართ არსებულ უკმაყოფილებას არ შეხებია.

მედიის ნაწილი მინისტრის გადადგომას უახლოეს პერიოდში ვარაუდობს და მიზეზად ტენდერებს ასახელებს. გავრცელებული ინფორმაციით, საფეხბურთო სტადიონების მშენებლობასთან დაკავშირებული ტენდერები ყიფიანის მეგობრის კომპანიამ მოიგო, რომელშიც გაყიდვების მენეჯერის ადგილს მინისტრის ძმა იკავებს. ინფორმაციას ყიფიანის შესაძლო გადადგომის შესახებ სამინისტროს პრესსამსახური უარყოფს და ბრალდებებს ცილისწამებას უწოდებს.

სწორედ ტენდერები და ოლიმპიადისთვის მოსამზადებელი სამუშაოებია მთავარი მიზეზი, რის გამოც კომიტეტის წევრების მოთხვნას ნაციონალური მოძრაობაც უერთდება.

ოპოზიციისა და თავად მმართველი გუნდის კრიტიკის მიუხედავად, მთავრობის წევრები მინისტრის საქმიანობას მაღალ შეფასებას აძლევენ.

უცნობია, მოახდენს თუ არა რეაგირებას პრემიერი კომიტეტის უარყოფით დასკვნაზე. საპარლამენტო წრეებში არ გამორიცხავენ, რომ დეპუტატებმა მინისტრის უნდობლობის პროცედურა წამოიწყონ.

"რუსთავი-2"