საქართველოს თავდაცვის მინისტრი მინდია ჯანელიძე ირაკლი ალასანიას საპასუხოდ აცხადებს, რომ არანაირი ხელმოწერილი ხელშეკრულება საფრანგეთთან არ არსებობს და აზუსტებს, რომ ხელი მოეწერა არა ხელშეკრულებას, არამედ მემორანდუმს.
„არ არსებობს არანაირი ხელშეკრულება, მთელი პასუხისმგებლობით ვაცხადებთ, ამას ვამბობდით წარსულშიც, მაგრამ აქვე ვამბობდით, რომ ხელმოწერა განხორციელდა ე.წ. განზრახულობათა წერილზე, იგივე მემორანდუმზე, რომელიც ხელშეკრულებისგან განსხვავებით სრულიად სხვა სახის საერთაშორისო სამართლებრივი დოკუმენტია შედეგების თვალსაზრისით.
ანუ ეს გულისხმობს, რომ ხელშეკრულებას მოსდევს კონკრეტული ვალდებულებები, რომელიც უნდა შეასრულოს ხელშეკრულების ორივე მხარემ.
მემორანდუმი, ეს არის დეკლარაციული სახის დოკუმენტი, რომელიც გულისხმობს მხარეების კეთილ ნებას კონსულტაციების თაობაზე. ამ დოკუმენტს, კი ბატონო, ხელი მოეწერა“, - განაცხადა მინისტრმა.
მისივე განმარტებით, მემორანდუმი რაიმე კონსულტაციების წარმოების წინაპირობა არ არის. თუმცა, მისი თქმით, ფრანგულ მხარესთან კონსულტაციები და მოლაპარაკებები გრძელდება, რაც საფრანგეთის ელჩმა დაადასტურა.
