2015-04-03 22:18

"ევროპელი დემოკრატების" ლიდერი პაატა დავითაია აფხაზური მედიის მიერ პირველ აპრილს ხუმრობით გავრცელებულ ცრუ ინფორმაციას წამოეგო და საპასუხო განცხადება გააკეთა. 

ამის შესახებ აფხაზური მედია წერს. მათი მონაცემებით, 1 აპრილს, აფხაზურმა გამოცემებმა შეგნებულად გაავრცელეს ინფორმაცია ე.წ. სახელმწიფო საზღვარზე რუსეთთან, ფსოუს გამშვებ პუნქტზე მიმოსვლის რეჟიმი გაამარტივეს. 

1 ხელისუფლების მხრიდან ამ ინფორმაციაზე გამოხმაურება არ ყოფილა. ხოლო 2 აპრილს "ევროპელი დემოკრატების" ლიდერმა პაატა დავითაიამ "პირველის" პრესკლუბში მკაცრი განცხადებები გააკეთა:

"იმ სიჩუმის ფონზე, რაც საქართველოს მთავრობაშია, დღეს გაიხსნა ოფიციალურად მიმოსვლა აფხაზეთსა და რუსეთს შორის. ე.წ. საზღვარი ფსოუზე მოიხსნა. გაკვირვებული ვარ, რომ არანაირი რეაქცია არ აქვს ამაზე საქართველოს მთავრობას.

გასაგებია, რომ ანექსია გრძელდება, ოკუპირებულია საქართველოს ტერიტორიები, მაგრამ ამის მიჩუმათება არ შეიძლება. ფაქტობრივად, საქართველოს სახელმწიფო საზღვარი რუსეთთან გახდა ღია. ყველანაირი ბლოკპოსტი, თუ მაკონტროლებელი ორგანოები, რომელიც სეპარატისტებს გააჩნდათ, აღებულია იქიდან.

ეს ყველანაირ შეთანხმებას არღვევს, რაც კი საერთაშორისო მასშტაბით არსებობს. ამით დაირღვა ის შეთანხმებაც, რომლის მიხედვითაც ე.წ. საზღვარზე შვეიცარიელი მესაზღვრეები უნდა განლაგებულიყვნენ. ეს საზღვარი მოისპო და საზღვარი დღეს უკვე ენგურზე გადის", - თქვა მან და მთავრობას აჟიოტაჟის ატეხვისკენ მოუწოდა.