ბრიუსელში ევროკავშირთან სტრატეგიული დიალოგის მესამე შეხვედრა გაიმართა. მასში მონაწილეობა მიიღეს შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა პაატა ზაქარეიშვილმა და სახელმწიფო მინისტრის პირველმა მოადგილემ ქეთევან ციხელაშვილმა.
ევროკავშირთან სტრატეგიული დიალოგის ფარგლებში მხარეებმა განიხილეს დღის წესრიგით გათვალისწინებული საკითხები, მათ შორის ჩართულობის პოლიტიკის ასპექტები საქართველოს ოკუპირებულ ტერიტორიებზე, რომელიც დიალოგის ცენტრალურ თემას წარმოადგენდა.
შეხვედრა დახურულ კარს მიღმა, 5 საათის განმავლობაში გრძელდებოდა. რა სახის ცვლილებას ითხოვს ევროკავშირი ოკუპირებულ აფხაზეთთან და სამხრეთ ოსეთთან დაკავშირებით არსებულ კანონში, არ კონკრეტდება, ზაქარეიშვილმა მხოლოდ ზოგადი მინიშნება გააკეთა:
"ის, რომ ცვლილებები რუსეთის ინტერესშია, არაა სიმართლე, ამას ევროკავშირი ითხოვს", - თქვა მან, მაგრამ მოთხოვნილი ცვლილებების შინაარსი მაინც არ დააკონკრეტა, მხოლოდ იმას გაუსვა ხაზი, რომ იმედია, პარლამენტი ბრიუსელიდან მაინც შეისმენს ცვლილებების აუცილებლობის მოთხოვნას.
სავარაუდოდ, ცვლილებებში იგულისხმება პასუხისმგებლობის შემსუბუქება ან სულაც გაუქმება იმ პირებისა და ბიზნეს-კომპანიების მიმართ, რომლებიც თბილისის გვერდის ავლით მოხვდებიან ოკუპირებულ ტერიტორიებზე.
როგორც "ნეზავისიმაია გაზეტა" წერს, ევროკავშირს სურს, ევროკავშირის ქვეყნებთან უვიზო მიმოსვლის შემთხვევაში, ოკუპირებულ ტერიტორიებზე მცხოვრებმა მოქალაქეებმა იგივე ან თითქმის იგივე სარგებელი მიიღონ, რასაც საქართველოს სხვა მოქალაქეები მიიღებენ.
შეფასებებში უფრო ფრთხილი იყო ქართული დელეგაციის ხელმძღვანელი თამარ ბერუჩაშვილი, რომელმაც განაცხადა, რომ ევროკავშირის მოთხოვნები შესწავლას, ახალი რესურსის გამოყენებას საჭიროებს, თუმცა, მოთხოვნის შინაარსი არც მას დაუკონკრეტებია.
იმავე "ნეზავისიმაია გაზეტას" თქმით, საქართველოს ხელისუფლებისთვის ევროინტეგრაცია მტკივნეულად მიმდინარეობს და ის "ქართული ოცნების" თავის ტკივილად იქცა, რასაც კარგად იყენებს ოპოზიციაში აღმოჩენილი ყოფილი მმართველი პარტია.
სტატიის ავტორი წერს, რომ ძნელი წარმოსადგენი არაა, როგორ შეხვდება ოკუპირებული ტერიტორიების შესახებ კანონში ცვლილებების მოთხოვნას ენმ, მით უმეტეს, რომ, სტატიის თანახმად, რიგის სამიტზე ვერც უკრაინა და ვერც საქართველო უვიზო მიმოსვლას ვერ მიიღებენ, თუმცა, ამის შესახებ ოფიციალურად არავის განუცხადებია.
შეგახსენებთ, ევროკავშირზე ადრე ოკუპირებული ტერიტორიების შესახებ კანონის გაუქმებას ან, უკიდურეს შემთხვევაში, მასში ცვლილებების შეტანას და ლიბერალიზაციას ჯერ კიდევ ხელისუფლების შეცვლისთანავე ოფიციალური მოსკოვი ითხოვდა.
ლაშა ბერულავა
