2014-04-03 10:41

იმ პოსტსაბჭოთა სივრცის ქვეყნების ჩამონათვალში, რომლებთანაც ნატომ სამხედრო თანამშრომლობის გაღრმავება გადაწყვიტა, საქართველო არ არის.

როგორც  The Guardian წერს, რუსეთის მიერ უკრაინის ნაწილის მიტაცების შემდეგ ნატომ გადაწყვიტა, პოსტსაბჭოთა სივრცის ქვეყნები რუსეთის შემდგომი, შესაძლო აგრესიისგან დაიცვას და ამ მიზნით 1 აპრილს ახალი გეგმა გაახმიანა, რომლის მიხედვითაც ნატო სომხეთთან, აზერბაიჯანთან და მოლდოვასთან ერთობლივი სწავლების გამართვას გეგმავს.

„მიმდინარე კონტექსტში აღმოსავლეთ ევროპაში სტაბილურობის მხარდასაჭერად“, - ასე ჰქვია გეგმას, რომელიც ნატოს ქვეყნების საგარეო საქმეთა მინისტრებმა ბრიუსელში 1 აპრილს შეიმუშავეს და რომელიც ზემოთჩამოთვლილ სამ ქვეყანასთან სამხედრო თანამშრომლობის გაღრმავებას ითვალისწინებს. ჩამონათვალში არ არის საქართველო. ეს, შესაძლოა, იმით იყოს გამოწვეული, რომ ზემოთჩამოთვლილ ქვეყნებთან ალიანსი თანამშრომლობის პირველ ეტაპს იწყებს, რაც საქართველოსთან მიმართებაში, უკვე წლების წინ გავლილი ფორმაა.

გეგმის მიხედვით, ნატო მოლდოვაში საკვანძო კავშირის ცენტრის გახსნას გეგმავს, სომხეთში - სამხედრო მომზადების ცენტრის შექმნას, ხოლო აზერბაიჯანში განახორციელებს პროექტებს, რომლებიც მიმართული იქნება კასპიის ზღვაში ნავთობისა და ბუნებრივი აირის საბადოების დასაცავად.

ნატოს კომიტეტმა, ამ საკითხების გარდა, ბრიუსელში უკრაინის შეიარაღებული ძალებისთვის დახმარების აღმოჩენისა და რუსეთთან თანამშრომლობის შეჩერების გადაწყვეტილებებიც მიიღო.