2014-03-23 12:39

საქართველოს მესამე პრეზიდენტის დაკითხვაზე დაბარებას შვედეთი საგარეო საქმეთა მინისტრი კარლ ბილდტი გამოეხმაურა და განაცხადა, რომ პოლიტიკურ რევანშს ევროპაში მომავალი არა აქვს.

ამასთან, კარლ ბილდტმა 2013 წლის ოქტომბერში საქართველოში მისი ვიზიტი გაიხსენა. მისი თქმით, მაშინდელ პრემიერმინისტრთან ერთად შეთანხმდნენ, რომ პოლიტიკური რევანში საქართველოში არ იქნებოდა.

„როდესაც ბოლოს თბილისში ვიყავი და ბატონ ივანიშვილს შევხვდი, შევთანხმდით, რომ რევანშის პოლიტიკა დასრულდებოდა, რადგან ასეთი პოლიტიკა ძალიან საშიშია საქართველოსთვის. ასეთი პოლიტიკა საფრთხეს შეუქმნის ქვეყანას და ძირს გამოუთხრის მის განვითარებას“, - განაცხადა კარლ ბილდტმა.

შეგახსენებთ, რომ 2013 წელს საქართველოში ვიზიტის შემდეგ, კარლ ბილდტს ინტერვიუ რადიო „თავისუფლებამ“ ჩამოართვა:

„შვედეთის საგარეო უწყების ხელმძღვანელს რადიო „თავისუფლების“ კორესპონდენტმა ჰკითხა, აგრეთვე, შესაძლებელია თუ არა, რომ საქართველოს პრეზიდენტი მიხეილ სააკაშვილი, მის წინააღმდეგ გამოძიების დაწყების შემთხვევაში, ახალი ტიმოშენკო გახდეს (უკრაინის ყოფილი პრემიერ-მინისტრი იულია ტიმოშენკო, როგორც ცნობილია, პატიმრობაში იმყოფება).

პასუხად ბილდტმა გამოთქვა მოსაზრება, რომ „ამ კონკრეტულ შემთხვევაში, შესაძლოა, უარესიც“ მოხდეს.

„ჩვენ ძალიან მკაფიოდ ვუთხარით ბატონ ივანიშვილს, რომ თუ ამ საქმეს წამოიწყებს, საქართველოს საგარეო პოლიტიკა, შეიძლება ითქვას, ამ ერთი საკითხით შემოიფარგლება მომდევნო რამდენიმე წელი, რაც ზიანს მიაყენებს ქვეყნის განვითარებას“, - განაცხადა ბილდტმა.

„შვედეთის საგარეო საქმეთა მინისტრის, კარლ ბილდტის განცხადებით, საქართველოში არსებობს „შურისძიების პოლიტიკის“ საფრთხე. ეს მოსაზრება მან გამოთქვა ბრიუსელში, რადიო თავისუფლებისთვის მიცემულ ინტერვიუში, 2013 წლის 5 ნოემბერს.