2014-03-21 22:21

საქართველოს ყოფილმა მთავარმა პროკურორმა მურთაზ ზოდელავამ „პოზიციაში“ განაცხადა, რომ გავრცელებული ფოტოების ავთენტურობის დადასტურება პროკურატურის მხრიდან ნიშნავს, რომ ეს მასალები კონფიდენციალური აღარ არის.

მისი განცხადებით, ამ საქმეში პროკურატურის ხელი ურევია: „ხომ ლოგიკურია, რომ ამ მასალების გავრცელებაში პროკურატურის ხელი ურევია, ანუ იმის, ვისაც ხელი მიუწვდება. სოფლის მეურნეობის სამინისტროს ხომ არ მიუწვდება ხელი გამოძიების მასალებზე?“, - კითხულობს მურთაზ ზოდელავა.

„გამოდის, რომ სისხლის სამართლის საქმეში დაცული მასალები ვიღაცამ აიღო, ამოიდო იღლიაში, მშვიდად წავიდა და განათავსა „იუთუბზე“. რა ლოგიკაა ეს, არ მესმის. და ამას თვითონ ადასტურებენ, როცა ამბობენ, რომ გავრცელებული ფოტოები ავთენტურია“, - აცხადებს მურთაზ ზოდელავა.

მისი თქმით, ეს ყველაფერი მხოლოდ იმას ნიშნავს, რომ „ეს მასალები კონფიდენციალური აღარაა, ის გახდა დერეფანი, სადაც ვისაც მოუნდება, გაივლის“.

საქართველოს მთავარი პროკურორის თქმით, არც იმას გამორიცხავს, რომ მისი სეიფიდან იარაღი ამოიღონ და განაცხადონ, რომ იპოვეს:

„მაგრამ ალბათ, ეს მხოლოდ იმ შემთხვევაში მოხდება, თუკი ჯერ ვინმე განათავსებს იარაღის ფოტოებს „იუთუბზე“. მერე დაადასტურებენ, ავთენტურიაო“.