2014-03-20 18:32

„რუსთავი-2“-ის გენერალური დირექტორი ნიკა გვარამია რეიტინგების მთვლელი კომპანია „თი ვი ემ არ საქართველო“-ს მიერ საქმიანობის შეჩერებას ეხმიანება და მიიჩნევს, რომ ხელისუფლებამ ნაბიჯი გადადგა დიქტატურისკენ.

„დღეს მივიღეთ მდგომარეობა, როცა არ გვაქვს ვალიდური რეიტინგები და ამის გამო ძალიან დიდი პრობლემის წინაშე დადგება სარეკლამო დროის გაყიდვის საკითხი, შესაბამისად ტელეკომპანიებს შეექმნებათ ფინანსური პრობლემები. ფინანსური პრობლემა არ შეექმნებათ მხოლოდ იმ ტელეკომპანიებს, რომლებსაც დააფინანსებენ - ვინ არიან ის დამფინანსებლები, ვიცით ძალიან კარგად.

შეგიძლიათ იხილოთ ის ტელეკომპანიები, რომლებმაც ხელი არ მოაწერეს მიმართვას და, პირდაპირ ვიტყვი, ესენი არიან „იმედი“ და „კავკასია“ და სამწუხაროდ, როგორც ჩანს, ჩართული არიან ხელისუფლების ბინძურ თამაშში. მადლობა ტელეკომპანია „მაესტროს“, რომელიც სარეკლამო შემოსავლებით არსებობს და იბრძვის სხვა ტელეკომპანიებისა და მედიასაშუალებების მხარდამხარ რომ იყოს ფინანსურად დამოუკიდებელი მედია. როგორც ჩანს, სხვა ტელეკომპანიების ინტერესებშია, რომელი ჰაკიმ ფაშა გამოაგდებს ვიდეოებს...

მე მოვუწოდებ ხელისუფლებას და პარლამენტის თავმჯდომარეს, რომელიც დარჩა ერთადერთ თანამდებობის პირად, ვისთვის მიმართვასაც აზრი აქვს: მეგობრებო! დღეს თქვენ გადადგით ნაბიჯი დიქტატურისკენ, თქვენ მარხავთ მედიას საქართველოში. ეს არ ჩაივლის უკვალოდ და მოგიწევთ მძიმე ფასის გადახდა, ისევე, როგორც მოუწია ყველა წარსულ ხელისუფლებას, წინას ჩათვლით. ეს ურემი ძალიან მალე გადაბრუნდება და ძალიან მძიმე პასუხისმგებლობა მოგიწევთ“, - ამბობს ნიკა გვარამია და ამატებს, რომ ზეწოლის მოლოდინშია:

„ველოდებით სარეკლამო კომპანიებზე ზეწოლასაც. ირაკლი ოქრუაშვილის დაკითხვა, შესაძლოა, სწორედ „რუსთავი-2“-ის საკითხს და არა ტელეკომპანია „იმედის“ გასხვისების საკითხს უკავშირდებოდეს, რადგან „იმედის“ გასხვისების დროს ოქრუაშვილი, საერთოდ, ქვეყანაში არ იმყოფებოდა“, - აცხადებს ნიკა გვარამია.