2014-03-16 23:44

წინასწარი მონაცემების მიხედვით, ყირიმში ჩატარებულ რეფერენდუმში მონაწილეთა 93%–მა ნახევარკუნძულის რუსეთთან შეერთებას დაუჭირა მხარი, ხოლო უკრაინის ტერიტორიული მთლიანობის მომხრე სულ 7% აღმოჩნდა.

შეგახსენებთ, რომ რეფერენდუმში მონაწილეობა არ მიუღიათ ადგილობრივ ტათრებს – მათმა 90%–მა რეფერენდუმს ბოიკოტი გამოუცხადა.

ყირიმის ნახევარკუნძულის საკვანძო ქალაქებში რეფერენდუმის შედეგებს უკვე ზეიმობენ. მედიის მონაცემებით, ამ დროისთვის ბევრ ქალაქში ღია ცის ქვეშ იწყება კონცერტები რუსი შემსრულებლების მონაწილეობით, რომლებიც, წინასწარი ინფორმაციით, დილამდე გაგრძელდება.

ამასთან, ისევ ალყაში რჩებიან უკრაინული სამხედრო ნაწილები ყირიმის ნახევარკუნძულზე. მედიის ინფორმაციით, ფეოდოსიაში, სამხედრო ნაწილის ირგვლივ მდებარე კორპუსები დანაღმულია, ხოლო უკრაინელი სამხედროები რეფერენდუმის შედეგების გამოცხადების შემდეგ სერიოზულ პროვოკაციებს ელოდებიან და ამისთვის საბრძოლო მზადყოფნას აცხადებენ.

მოსალოდნელ პროვოკაციებზე საუბრობს ყირიმის თვითგამოცხადებული ხელისუფლებაც. მათი თქმით, პროვოკაცია მოსალოდნელია არა რუსი სამხედროების, არამედ კიევის მხრიდან.