უკრაინული ტელევიზიის ТСН-ის გადამღებმა ჯგუფმა, რომლებიც მასალაზე მუშაობის დროს დააკავეს და აფხაზეთიდან გამოაძევეს, ყირიმის აფხაზური სცენარით განვითარებაზე სიუჟეტი მოამზადა.
ТСН სიუჟეტში აფხაზეთის დღევანდელ მდგომარეობას აღწერს.
ჟურნალისტის თქმით, მთელ აფხაზეთში ათამდე შუქნიშანია და მხოლოდ 3 ბანკომატი. აქედან 2 სოხუმშია, ხოლო ერთი გაგრაში, ამ ორ ქალაქ შორის მანძილი 80 კილომეტრია. ამ ბანკომატებიდან არ შეიძლება დღეში 100$-ზე მეტი გამოიტანო რუსულ რუბლებში.
ერთადერთი მნიშვნელოვანი, რაც რუსული ფულით აფხაზეთში გაკეთდა, არის გზატკეცილი. ეს გზატკეცილი კი ქვეყანაში ერთადერთი გამართული გზაა და ის ერთმანეთთან, თითქმის, ყველა ქალაქს აკავშირებს. მათ შორის მოგზაურობა მხოლოდ ე.წ. მარშუტკებითაა შესაძლებელი ან ტაქსით. აფხაზეთის რკინიგზა სრულიად პარალიზებულია.
რკინიგზის ხაზი „რუსეთის რკინიგზას“ ეკუთვნის, რომელთანაც 5 წლის წინ გაფორმდა ხელშეკრულება და მათ გაარემონტეს რკინიგზის აფხაზური მონაკვეთი. ამის მიუხედავად, ოლიმპიურ თამაშებთან დაკავშირებულ უსაფრთხოების ზომების გამო, მატარებლები საერთოდ არ დადიან.
სოხუმის აეროპორტი სრულიად ცარიელია და ამ ობიექტთან დაცვაც არ დგას.
მაღაზიებში მხოლოდ რუსული პროდუქცია იყიდება. ადგილობრივების თქმით, ადრე მაღაზიებში ქათმის კვერცხი მაინც იყო ადგილობრივი წარმოების, თუმცა პრდოუქტებზე ფასების ზრდის გამო, ესეც აღარაა.
აფხაზები ვერც თავიანთ ქვეყანას ვერ ტოვებენ. ამისთვის ფულის გარდა, ვიზებია საჭირო. სოხუმში კი მხოლოდ რუსეთის დიპლომატიური წარმომადგენლობაა.
აფხაზეთის ერთ დროს საუკეთესო სანატორიუმ „უკრაინას“ ახლა „მოსკოვი“ ჰქვია, ხოლო სსრკ-ს კომუნისტური პარტიის მდივნის აგარაკში ახლა „ეფ-ეს-ბე“ ბინადრობს.
news.ge-ს მიხედვით
