2022-06-01 18:55

 1 ივნისს რადიო "დარდიმანდის" დაბადებისდღეა. რადიოსი, რომელიც უკვე 12 წელია ერთგულად ემსახურება საყვარელ მსმენელს და ზრუნავს მათზე.

რადიო "დარდიმანდის" მენეჯერს თეო დარჩიას ვთხოვეთ რომ მის "შვილობილზე" ესაუბრა:

"დარდიმანდი"- ჟღერს ქართულად - ეს არის ჩვენი სლოგანი და დიახ, ეს არის რადიო, რომელიც უკვე 12 წელია სწორედ ყველაზე ქართულად ჟღერადი რადიოა. რადიო, რომელიც უყვარს ყველა იმ ადამიანს , ვისაც უყვარს ქართული სიმღერა და ჩვენს რადიო მსმენელს 24 საათის განმავლობაში ვანებივრებთ ქართული ქალაქური სიმღერით და არა მხოლოდ ქალაქური, ჩვენთან ჟღერს საესტრადო სიმღერები, ფოლკი, ქართული პოპ მუსიკა, ქართველი უკვდავი კომპოზიტორების მიერ დაწერილი სიმღერები, რომელსაც ქართველი მომღერლები ასრულებენ.

 რას ნიშნავს თქვენთვის "დარდიმანდი"?

-,,დარდიმანდმა“  ჩემთვის მნიშვნელობა უკვე მრავალი წელია შეიძინა. სანამ ამ გუნდს შემოვუერთდებოდი, ყოველთვის მსმენოდა მის შესახებ, რომ იყო რადიო, რომელიც ასე ძალიან უყვარდა ხალხს. მათთან ერთად ,,დარდიმანდის“ სიყვარული მეც გავიზიარე  და ასე ერთად, უკვე 6 წელია  მოვდივართ და ერთი დღეც ჩემს ცხოვრებაში მის გარეშე ვერ წარმომიდგენია.

 თქვენი აზრით რისი დამსახურებაა ის რომ ამდენი წლის განმავლობაში გყავთ უამრავი ერთგული და თქვენზე უზომოდ შეყვარებული მსმენელი?

- ჩვენ ყოველთვის ვიცით რა უყვარს ჩვენს მსმენელს, რა მოსწონს და რას მიიღებს ჩვენგან და სწორედ ამას ვთავაზობთ. ამაში ძალიან დიდ შრომას ვდებთ, დიდი ხნის განმავლობაში ვფიქრობთ პროექტებზე, გადაცემებზე, რომელიც გარდა იმისა, რომ მათ ძალიან ბევრ სიახლეს მოუტანთ, გაახალისებთ და  საინტერესოს გახდის მათ ყოველდღიურობას. არ შემიძლია ჩვენი მსმენელების ერთგულებაზე არ ვისაუბრო, ისინი 12 წელია ჩვენთან ერთად მოდიან. განსაკუთრებით ჩვენს მსმენელებს უყვართ მუსიკალური თხოვნები, სადაც ერთმანეთს უძღვნიან სიმღერებს, მოკითხვებს და დიდ სიყვარულს, ეს მათი ყოველდღიური რუტინაა და ჩვენ ისინი ძალიან გვიყვარს.

 რადიო "დარდიმანდი" მუდმივად ცდილობს რომ საკუთარ მსმენელს სიახლეები არ მოაკლოს. სამომავლოდ თუ გეგმავთ სიახლეებს?

- სამომავლოდ არა ერთ პროექტს ვგეგმავთ, ახალ გადაცემებს , ახალი რადიო წამყვანების ჩართულობით. გვინდა, რომ ბევრი ისეთი გადაცემა დავაბრუნოთ ეთერში, რომელმაც დიდი პოპულარობა მოუტანა რადიო „დარდიმანდს“.  ასე რომ,  გპირდებით ბევრ ახალ გადაცემას ახალი წამყვანებით.

  რას უსურვებთ რადიო "დარდიმანდს"?

- რადიო დარდიმანდს ვუსურვებ რეიტინგების სიაში შეენარჩუნებინოს პირველი ადგილი, რაც დიდი ხანია უჭირავს, ვუსურვებ ბევრ ახალ პროექტს. მოკლედ, ძალიან დიდ წარმატებას ვუსურვებ, რისთვისაც ჩვენ ჩვენს ძალებს არ დავიშურებთ.

და ბოლოს, დიდი მადლობა მინდა გადავუხადო ჩვენს გენერალურ დირექტორს, რადიო დარდიმანდის დამფუძნებელს ნინო ჩხეიძეს, რომ ასე ერთგულად დგას ჩვენთან ერთად, აქტიურად იღებს მონაწილებას ყველა იმ საქმეში,  რაც დარდიმანდში ხდება. სწორედ მისი ძალიან დიდი დამსახურებაა ის ყველაფერი, რაზეც აქამდე გესაუბრეთ.