-
2020-05-08 13:53
გუშინ საფუძველი ჩაეყარა უკრაინის რეფორმირებას განვითარების, წარმატების, სიმდიდის, კეთილდღეობის გზაზე და მეტიც, დასაბამი დაედო ორ ქვეყანას შორის ურთიერთობის კიდევ უფრო გაღრმავებასა და განმტიკიცებას, - ამის შესახებ “ნაციონალური მოძრაობის” ერთ-ერთმა ლიდერმა, ნიკა მელიამ მიხეილ სააკაშვილის უკრაინის რეფორმების აღმასრულებელი კომიტეტის თავმჯდომარედ დანიშვნასთან დაკავშირებით განაცხადა.
როგორც მელიამ ბრიფინგზე აღნიშნა, ეს არ არის მხოლოდ “ნაციონალური მოძრაობის” წარმატება, ეს არის მთელი ქვეყნისა და თითოეული მოქალაქის წარმატება.
“გუშინ უკრაინისა და საქართველოს საზოგადოებრივ-პოლიტიკურ ცხოვრებაში არ იყო ერთი რიგითი, მორიგი კალენდარული დღე, არამედ პირიქით, გუშინდელი დღე იყო ძალიან მასშტაბური, ისტორიული მნიშვნელობის დღე, თავისი მიღებული გადაწყვეტილებით. როგორც არასოდეს, გუშინ საფუძველი ჩაეყარა ჩვენი მეგობარი სახელმწიფოს, უკრაინის, 45-მილიონიანი სახელმწიფოს რეფორმირებას განვითარების გზაზე, წარმატების გზაზე, სიმდიდრის გზაზე, კეთილდღეობის გზაზე და მეტიც, დასაბამი დაედო ორ ქვეყანას შორის ურთიერთობის კიდევ უფრო გაღრმავებასა და განმტიკიცებას. ეს ერთი და მეორე მხრივ, რა თქმა უნდა, ორივე ქვეყანაში, ორივე სახელმწიფოში ცალკე აღებულ კიდევ უფრო მეტ პროგრესს, მაგრამ ეს არ არის მხოლოდ ცალკე აღებული ერთი რომელიმე ჯგუფის წარმატება. გუშინდელი დღე შეიძლება შეფასდეს და დანახულ იქნას მომავლის გადმოსახედიდან. თუკი ჩვენ გუშინდელ დღეს შევაფასებთ და დავინახავთ მომავალის გადმოსახედიდან, ჩვენ უკვე დღესვე არ გაგვიჭირდება დავადგინოთ და დავრწმუნდეთ ორ რამეში: ერთი, დავრწმუნდეთ და დავადგინოთ ამ ისტორიული მოვლენის ჭეშმარიტი ფასი და მეორე, საკუთარ საერთო წარმატებად მივიჩნიოთ. ეს არ არის ჩვენი, მხოლოდ "ნაციონალური მოძრაობის" წარმატება, ეს არის ჩვენი ქვეყნის წარმატება, ეს არის ჩვენი ყველასი წარმატება, ეს არის თქვენი წარმატება, ეს არის მათი წარმატება. მნიშვნელოვანია ყველამ დღესვე გავაცნობიეროთ მომხდარი და ერთმანეთს გამოვუტყდეთ სიმართლეში და ვთქვათ, რომ მიხეილ სააკაშვილის წარმატება ჩვენს პარტნიორ სახელმწიფოში, გზას გაუხსნის საქართველოს წარმატების და გამარჯვების გზებს”, - განაცხადა მელიამ.
მისივე თქმით, ორ ქვეყანაში გამარჯვების დრო დადგა.
“გამარჯვების გარდა ჩვენი ქვეყნის მოსახლეობას სხვა არჩევანი არ აქვს და დადგა გამარჯვების დრო უკრაინაში, დადგა გამარჯვების დრო საქართველოში, დადგა დრო, რომ ჩვენი ქვეყნის ისტორიული ბორბალი, რომელიც სამწუხაროდ, ჯერ კიდევ უკუღმა ტრიალებს, წაღმა დავატრიალოთ და შევისისხლხორცოთ რწმენა იმის, რომ ჩვენ შევძლებთ ვიყოთ წარმატებული ქვეყანა. გუშინდელი დღე არის მისალოცი ყველასთვის, განურჩევლად პოლიტიკური მრწამსისა და მე იმედს ვიტოვებ, რომ გავა ათწლეულები და იმ გადმოსახედიდან ჩვენ ყველანი ვიქნებით ბედნიერები, რომ ნაწილმა საჯაროდ დავაფიქსირეთ ჩვენი კმაყოფილება, მაგრამ რაღაც ნაწილი ალბათ გულში დააფიქსირებს კმაყოფილებას, მაგრამ ამას მნიშვნელობა არ აქვს, მნიშვნელობა ექნება იმას, რომ სიკეთე აისახოს ჩვენს ქვეყანაზე, აისახოს საქართველოზე და მის განვითარებაზე”, - აღნიშნა მელიამ.
ცნობისთვის, გუშინ, 7 მაისს უკრაინის პრეზიდენტმა ვლადიმერ ზელენსკიმ საქართველოს ყოფილი პრეზიდენტი მიხეილ სააკაშვილი რეფორმების აღმასრულებელი კომიტეტის თავმჯდომარის თანამდებობაზე დანიშნა.