ეს არის მხოლოდ დასაწყისი იმ ზეწოლის, რაც უახლოეს მომავალში განხორციელდება ბიძინა ივანიშვილზე შეთანხმების შესრულების უზრუნველყოფის მიზნით, - ასე ეხმაურება „ნაციონალური მოძრაობის” წევრი, სალომე სამადაშვილი ევროპარლამენტარ ანდრიუს კუბილიუსის საქართველოს ხელისუფლებისადმი მოწოდებას, სწრაფად შეასრულოს ოპოზიციასთან 8 მარტის შეთანხმება.
სამადაშვილის თქმით, თუ ხელისუფლება 8 მარტის შეთანხმების შესრულებაზე უარს იტყვის, გაართულებს არამარტო საკუთარ ცხოვრებას, არამედ ჩვენი ქვეყნის ურთიერთობას სტრატეგიულ მოკავშირეებთან.
„დადასტურდა ის, რომ პოლიტპატიმრების გათავისუფლება იყო 8 მარტის შეთანხმების ნაწილი და ამ შეთანხმების სრულად შესრულებას ელოდებიან ჩვენი საერთაშორისო პარტნიორები. ამ შეთანხმებაზე უარის თქმა ქვეყანას შეიყვანს უმძიმეს პოლიტიკურ კრიზისში და რა თქმა უნდა, შესაბამისად აისახება ჩვენს ურთიერთობებზე სტრატეგიულ მოკავშირეებთან, რადგან სწორედ დემოკრატიულ ღირებულებებს ეფუძნება პირველ რიგში ევროკავშირსა და საქართველოს შორის ურთიერთობები და მე ვფიქრობ, რომ ეს არის მხოლოდ დასაწყისი იმ ზეწოლის, რაც უახლოეს მომავალში განხორციელდება ბიძინა ივანიშვილზე შეთანხმების შესრულების უზრუნველყოფის მიზნით.
ზეწოლა გაგრძელდება. ჩვენ ვხედავთ, რომ ამერიკის კონგრესში კვლავ გააქტიურდა პროცესი, გაჩნდნენ სანქციების მოთხოვნის ახალი ხელმომწერები და შესაბამისად, ბიძინა ივანიშვილი და მისი ხელისუფლება ახლა, როცა ჩვენთვის ძალიან მნიშვნელოვანია საერთაშორისო პარტნიორების დახმარება და გვერდში დგომა, გაართულებენ არამხოლოდ საკუთარ ცხოვრებას, არამედ გაართულებენ ჩვენი ქვეყნის ურთიერთობას სტრატეგიულ მოკავშირეებთან 8 მარტის ხელშეკრულების შეთანხმებაზე უარის თქმით. ერთადერთი გზა, რაც ხელისუფლებას რჩება, ეს არის სამართლებრივი შესაბამისი მექანიზმების გამოყენებით პოლიტპატიმრების გათავისუფლება”, - განაცხადა სამადაშვილმა.
შეგახსენებთ, ევროპარლამენტის წევრმა, ანდრიუს კუბილიუსმა საქართველოს პრეზიდენტს, სალომე ზურაბიშვილს, პრემიერ-მინისტრს, გიორგი გახარიას და პარლამენტის თავმჯდომარეს, არჩილ თალაკვაძეს ღია წერილით მიმართა და მოუწოდა, ხელისუფლებამ შეასრულოს ოპოზიციასთან 8 მარტს მიღწეული შეთანხმება.