მართალია სასამართლო სისტემა დიდი ხანია რაც საქართველოს პოლარიზებული პოლიტიკის პრობლემური ნაწილი იყო, თუმცა დაპატიმრებებმა და მთელმა რიგმა სადავო სასამართლო საქმეებმა 2019 წელსა და 2020 წლის დასაწყისში კიდევ უფრო დაამძიმა ისედაც დაძაბული ვითარება,- ამის შესახებ Freedom House-ის ახლად გამოქვეყნებულ ანგარიშშია ნათქვამი.
ანგარიშში ბიზნესმენ მამუკა ხაზარაძისა და პოლიტიკური ლიდერის გიგი უგულავას საქმეებიცაა განხილული და ამასთანავე აღნიშნულია, რომ უზენაეს სასამართლოში 14 ახალი მოსამართლის უვადოდ წარგზავნა „უკიდურესად წარუმატებელი და არაპროფესიონალური პროცესის“ შედეგად მოხდა.
„პოლიტიკურ სივრცეში ახალგამოჩენილ ბიზნესმენს მამუკა ხაზარაძეს ფულის გათეთრებისთვის ბრალი წარუდგინეს, როგორც კი მან პოლიტიკური მოძრაობის დაფუძნების შესახებ განაცხადა. ამასთანავე, კარგად ცნობილ ოპოზიციონერ ლიდერს 38 -თვიანი პატიმრობა შეუფარდეს საჯარო სახსრების სავარაუდოდ ბოროტად გამოყენებისთვის.
დასტურად იმისა, რომ მსგავსი შემთხვევები არ შემოიფარგლებოდა მხოლოდ ქვედა ინსტანციის სასამართლოებით, საპარლამენტო უმრავლესობამ უზენაეს სასამართლოში 14 ახალი მოსამართლე უვადოდ დანიშნა „უკიდურესად წარუმატებელი და არაპროფესიონალური პროცესის შემდეგ,“- ნათქვამია ანგარიშში.
