2020-04-25 14:14

დარგი და თემა არ არის დარჩენილი პასუხის გარეშე, - ამის შესახებ პარლამენტის პირველმა ვიცე-სპიკერმა, გია ვოლსკის ანტიკრიზისულ გეგმასთან დაკავშირებით განაცხადა.

მისი თქმით, საქართველო მცირე რესურსების მქონე ქვეყანაა და ამ მცირე რესურსებით უნდა გადაირჩინოს თავი.

„მთავრობის ანტიკრიზისული გეგმა დამყარებულია არა პოლიტიკურ ნიშნებზე, როგორც ეს ჩვევიათ ჩვენს ოპონენტებს, არამედ ღრმა მეცნიერულ ანალიზზე და სიტუაციის შეფასებაზე. ამის დეტალური განხილვა მოხდა, დავამატეთ მხოლოდ ერთს - დარგი და თემა არ არის დარჩენილი პასუხის გარეშე. რასაკვირველია, ჩვენ არ უნდა ველოდოთ ეკონომიკურ ბუმს და ეს გეგმა არის სწორედაც ჩამოყალიბებული იმდენად, რამდენადაც პანდემიამ განაპირობა კრიზისი. კრიზისი არის ღრმა და ეს კრიზისი შეიძლება კიდევ უფრო გამწვავდეს. ქვეყნებმა თავი უნდა გადაირჩინონ. საქართველო მცირე რესურსების მქონე ქვეყანაა და მცირე რესურსებით უნდა გადაირჩინოს თავი და გამოვიდეს უმძიმესი მდგომარეობიდან. არავინ არ უნდა დაუშვას, რომ ეს გეგმა და განცხადებები არის რამენაირად დაკავშირებული პოზიტიურ პროცესებთან, ეს არის საგანგებოდ მძიმე მდგომარეობასთან დაკავშირებული გეგმა და არის პროფესიონალურად გამართული. ჩვენ უნდა გადავრჩეთ როგორც ჯანმრთელობის თვალსაზრისით, ასევე ეკონომიკურად”, - განაცხადა ვოლსკიმ.

შეგახსენებთ, რომ გუშინ, პრემიერ-მინისტრმა გიორგი გახარიამ ანტიკრიზისული ეკონომიკური გეგმის შემდეგი ეტაპით გათვალისწინებული ინიციატივები გააჟღერა. როგორც პრემიერმა გეგმის წარდგენისას განაცხადა, ქვეყანა კრიზისული მენეჯმენტისთვის 3 მილიარდ 500 მილიონ ლარს დახარჯავს. ანტიკრიზისული ეკონომიკური გეგმით საზოგადოების სხვადასხვა ნაწილის დახმარებაა გათვალისწინებული, მათ შორის მთავრობა ოფიციალურად დასაქმებულებს, რომლებმაც სამსახური დაკარგეს, 6 თვის განმავლობაში 1200 - თვეში 200 ლარით დაეხმარება, თვითდასაქმებულ მოქალაქეებს კი, მათი იდენტიფიცირების შემდეგ, ერთჯერადად 300 ლარს ჩაურიცხავს. გარდა ამისა, სახელმწიფო 600 ლარს გადაუხდის მრავალშვილიან და იმ ოჯახებს, რომელთა სოციალური სარეიტინგო ქულა 65 000-დან 100 000-მდეა. 600-ლარიანი დახმარებით ისარგებლებენ მკვეთრად გამოხატული შეზღუდული შესაძლებლობის მქონე პირები და შეზღუდული შესაძლებლობების მქონე ბავშვები, რომლებიც აღნიშნულ დახმარებას 6 თვის განმავლობაში მიიღებენ. ანტიკრიზისული ეკონომიკური გეგმით გათვალისწინებულია ასევე 2021 წლიდან პენსიის ზრდა, რომელიც ყველა პენსიონერისთვის 20 ლარით, ხოლო 70 წელს ზემოთ მყოფი პენსიონერებისთვის 25 ლარით გაიზრდება.

გარდა ამისა, მთავრობის მიერ წარდგენილი ანტიკრიზისული ეკონომიკური გეგმა ბიზნესის დახმარებასაც გულისხმობს. გიორგი გახარიას განცხადებით, ყველა ის კომპანია, რომელიც სამუშაო ადგილებს შეინარჩუნებს, 6 თვის განმავლობაში, 750 ლარამდე ხელფასის ანგარიშით, საშემოსავლო გადასახადის ნაწილში სრულ სუბსიდირებას მიიღებს. გარდა ამისა, პრემიერ-მინისტრის თქმით, მეწარმეების დახმარების მიზნით, ამოქმედდება დღგ-ს ავტომატური დაბრუნების მექანიზმი.ასევე, მისი თქმით, წელს ბიზნესი დამატებით 600 მილიონ ლარს მიიღებს.