2020-04-23 19:55

საპარლამენტო ფრაქციის „ქართული ოცნება“ თავმჯდომარე რატი იონათამიშვილი მიიჩნევს, რომ ოპოზიცია საარჩევნო თარიღის გადადებასთან დაკავშირებით გაკეთებული განცხადებებით საზოგადოებაში დისონანსის შეტანას ცდილობს.

როგორც მან ოპოზიციის წევრების განცხადებების კომენტირებისას აღნიშნა, არჩევნების გადადებით რეალურად სწორედ ოპოზიციაა დაინტერესებული.

„ჩვენი ინტერესი არის რომ კანონით დადგენილ ვადებში ჩატარდეს არჩევნები, რადგან ვფიქრობთ, რომ ეს სჭირდება ჩვენს ქვეყანას და ჩვენი ქვეყნის დემოკრატიულ განმტკიცებას. ვფიქრობ, საქართველო ღირსეულად გამოვა იმ საფრთხისგან, რასაც პანდემიის წინააღმდეგ ბრძოლა ჰქვია და ამის შემდეგ ცხადია, უკვე კანონით დადგენილ ვადებში ჩატარდება არჩევნებიც“, - აცხადებს იონათამიშვილი.

მისივე თქმით, ოპოზიციასთან არსებული შეთანხმება ინტერპრეტაციის საშუალებას არ იძლევა და საქართველოში პოლიტპატიმრები არ არსებობენ.

„ქართულმა საზოგადოებამ ყველაზე კარგად იცის, რომ დღეს საქართველოში პოლიტპატიმრები არ არსებობენ. რაც შეეხება შეთანხმებას ყველა პუნქტი არის ასახული შავით თეთრზე და არ იძლევა ინტერპრეტაციის საშუალებას. ჩვენ პირნათლად ვასრულებთ თითოეულ პუნქტს, მათ შორის შეთანხმებას საარჩევნო ცვლილებასთან დაკავშირებით და ოპოზიციასაც მოვუწოდებ, შეასრულოს ამ შეთანხმების თითოეული პუნქტი“, - აცხადებს იონათამიშვილი.