ჩვენ, ისევე როგორც მთელი პოლიტიკური სპექტრი, მონდომებული ვართ, რომ, რაც შეიძლება მალე განხორციელედეს კონსტიტუციური ცვლილებები და ეს აუცილებლად მოხდება,- ამის შესახებ პარლამენტის ვიცე-სპიკერმა, გიორგი კახიანმა განაცხადა.
მისი თქმით, როგორც კი სამართლებრივი თვალსაზრისით ამის საშუალება იქნება, საარჩევნო სისტემაში ცვლილებები შევა და მომავალი არჩევნები ამის შესაბამისად ჩატარდება.
„საგანგებო მდგომარეობის გამოცხადებამ სამართლებრივი თვალსაზრისითაც ხელი შეუშალა კონსტიტუციაში ცვლილებების განხორციელების პროცესს. თუმცა ჩვენ, ისევე როგორც მთელი პოლიტიკური სპექტრი, მონდომებული ვართ, რომ რაც შეიძლება მალე განხორციელედეს კონსტიტუციური ცვლილებები და როგორც კი სამართლებრივი თვალსაზრისით ამის საშაუალება მოგვეცემა გაგრძელდება კონსტიტუციური ცვლილებების განხორციელება. თუმცა ერთი რამ შემიძლია ვთქვა, ეს ცვილებები აუცილებლად განხორციელდება და ამ ცვლილებების შესაბამისად შემოდგომაზე, როგორც ესაა კონსიტუციურად გათვალისწინებული, ჩატარდება არჩევნები“,- განაცხადა კახიანმა.
ცნობისთვის, მიმდინარე წლის 8 მარტს ხელისუფლებასა და ოპოზიციას შორის საარჩევნო სისტემის თაობაზე შეთანხმება შედგა. მოლაპარაკებების შედეგად, 2020 წლის საპარლამენტო არჩევნები 120/30-ზე მანდატების თანაფარდობით უნდა ჩატარდეს.
