ირანი აშშ-ის სამხედრო გემებს გაანადგურებს იმ შემთხვევაში, თუ ისინი ჩვენს ხომალდებს საფრთხეს შეუქმნიან, - ამის შესახებ ირანის რევოლუციური გვარდიის ხელმძღვანელმა, ჰოსეინ სალამიმ აშშ-ის პრეზიდენტის განცხადების საპასუხოდ აღნიშნა.
„მე ბრძანება მივეცი ჩვენს საზღვაო ძალებს, გაანადგურონ ნებისმიერი ამერიკული ტერორისტული ძალა სპარსეთის ყურეში, რომელიც ირანის სამხედრო თუ არასამხედრო გემებს საფრთხეს შეუქმნიან“,-აღნიშნა სალამიმ.
მისივე თქმით, სპარსეთის ყურის უსაფრთხოება ირანის სტრატეგიული პრიორიტეტია.
ცნობისთვის, გუშინ აშშ-ის პრეზიდენტმა, ამერიკის სამხედრო ძალებს ბრძანება მისცა ირანის ხომალდები გაანადგურონ, თუ ისინი მათ საფრთხეს შეუქმნიან.
მედიის ინფორმაციით, გასულ კვირას შტატების 6 სამხედრო გემი საერთაშორისო წყლებში წვრთნებს გადიოდა, რა დროსაც მათ ირანის რევოლუციური გვარდიის ფლოტი აედევნა. ამერიკის საზღვაო ძალების ინფორმაციით, ირანული გემები მათი ხომალდების გარშემო დიდი სისწრაფით, ახლო მანძილზე გადაადგილდებოდნენ, რასაც მათი თქმით, პროვოკაციულია და შეტაკების შესაძლებლობას აჩენს.
