2020-04-23 13:23

ვაშინგტონში, სავალუტო ფონდის ცენტრალურ ოფისში სამი საკითხი იწვევს შეშფოთებას, პირველი არის, რატომ არ დაიწყო საქართველოს მთავრობამ, ამ დრომდე შემოსავლის გარეშე დარჩენილი ადამიანების ფინანსური მხარდაჭერის პროგრამა; რატომ იცრუა 500 მილიონთან დაკავშირებით და რატომ არ იწყება მასობრივი ტესტირება, - ამის შესახებ პარტია „ახალი საქართველოს“ თავმჯდომარე გიორგი ვაშაძემ საგანგებო ბრიფინგზე განაცხადა.

ვაშაძის თქმით, საქართველოს საკითხის განხილვა სავალუტო ფონდში 1 მაისს არის ჩანიშნული და მთავრობის მხრიდან მნიშვნელოვანია სისტემური და აქტიური მუშაობა, რათა მაქსიმალური ფინანსური რესურსები იქნას მოზიდული.

„გუშინ ხანგრძლივი საუბარი მქონდა ვაშინგტონში, სავალუტო ფონდის ცენტრალურ ოფისთან. სამი საკითხია, რომელიც მათ შეშფოთებას იწვევს. პირველი არის, რატომ არ დაიწყო საქართველოს მთავრობამ, ამ დრომდე შემოსავლის გარეშე დარჩენილი ადამიანების ფინანსური მხარდაჭერის პროგრამა; მეორე, რატომ იცრუა 500 მილიონთან დაკავშირებით, რადგან სავალუტო ფონდისგან წელს დამატებით მხოლოდ 280 მილიონის დახმარებაზეა საუბარი. ამასთან არ აქვთ ინფორმაცია, რამდენად რეალურია სამმილიარდიანი დახმარების საკითხიც და მესამე, რატომ არ იწყება მასობრივი ტესტირება, რადგან შეზღუდვების მოხსნის და ეკონომიკის ამუშავების ერთადერთი გზა არის მასობრივი ტესტირება. მათი მონაცემებით საქართველო ყოველდღიურად დაახლოებით 100 მილიონით ღარიბდება; საქართველოს საკითხის განხილვა სავალუტო ფონდში პირველ მაისს არის ჩანიშნული, ძალიან მნიშვნელოვანია მთავრობის მხრიდან სისტემური და აქტიური მუშაობა, რათა მოზიდულ იქნას მაქსიმალური ფინანსური რესურსები, რაც საჭიროა კრიზისის გადასალახად“, -განაცხადა გიორგი ვაშაძემ.