„ევროპული საქართველოს“ წევრის, გიგი წერეთლის განცხადებით, კორექტირების გარეშე საგანგებო მდგომარეობის ვადის გაგრძელება სწორი არ არის. როგორც წერეთელმა ბიუროს სხდომაზე განაცხადა, საგანგებო მდგომარეობამ ქვეყნის მოქალაქეების

ნაწილს პრობლემები შეუქმნა. ოპოზიციის წამომადგენელი ამბობს, რომ პრობლემებთან დაკავშირებით კითხვების დასმა პოპულიზმად არ უნდა მოინათლოს.

„საუბარი იმაზე, რომ უფლება არა გვაქვს იმაზე დაისვას კითხვა, რატომ არ მოდის პრემიერი? 2 მილიარდი, რომელიც გაცხადდა რას ნიშნავს, არის თუ არა კონკრეტული მიზნობრივი დახმარება და როდის იქნება ეს დახმარება? - ეს რატომ ინათლება პოპულიზმად ნამდვილად არ მესმის. ე.ი. ჩვენ არ გვესმის, რას ნიშნავს პარლამენტარიზმი, რას ნიშნავს პარლამენტი საგანგებო მდგომარეობაში. ოპოზიცია სადღაც ჩუმად ხომ არ არის შეყუჟული ან დარბაზში არ ზის და იქედან ურტყამს ხელისუფლებას? ასე არ ხდება. ჩვენ ვცდილობთ, მოგაწოდოთ მოსაზრებები. აქ ადრე ერთ-ერთ პასუხად მოვისმინე, რომ დიდი ქსელი იმიტომ დაიკეტა, რომ იქ დიდი მობილობაა და 20-30 ათასი კაცი შედის. ეს 20-30 ათასი კაცი ჩაკეტეთ სადმე? ისინი ხომ სხვა ქსელში მივიდნენ და მეტი საფრთხე გაჩნდა?! იგივე არის ჯარიმებზეც და კომენდანტის საათზე, ავტომობილებით გადაადგილების შეზღუდვებზე. ეს არის ის თემები, რომელზეც უნდა ვიმსჯელოთ. ასევე, იმაზეც, როდის მიიღებს ადამიანი დახმარებას, რომელიც დღეს სასოწარკვეთილი ელოდება საკვებს. რამდენიმე ასეულ ოჯახს რომ ვეხმარებით, ეს არ ყოფნით. მე კონკრეტულად „ევროპულ საქართველოზე“ ვამბობ და ბევრი ეხმარება, ალბათ. სახელმწიფოც აკეთებს ამას, მაგრამ არ არის ეს საკმარისი. ვხედავთ, რომ სირთულეებია. მით უმეტეს, ამის გაგრძელება და არაფრის კორექტირება, არ იქნება სწორი. მგონია, რომ პარლამენტია ის ადგილი, სადაც ამ ყველაფერს უნდა განვიხილავდეთ, პრემიერიც აქ უნდა იყოს და ეს არის ჩვენი კონტრიბუცია. სხვა შემთხვევაში იქნება მუდმივად პოლემიკა, რომელიც საქმეს ნამდვილად არ გამოადგება“, - განაცხადა წერეთელმა.