2020-04-22 11:36

თბილისის ზღვის ჰოსპიტალის კრიტიკული მედიცინის დეპარტამენტის ხელმძღვანელის, მარეხი ბექაიას განცხადებით, კორონავირუსზე ჩატარებული 40 კვლევიდან 32 უარყოფითი პასუხია მიღებული. როგორც მან ჟურნალისტებს განუცხადა, 8 პაციენტის კვლევა გრძელდება და მათი ტესტის პასუხი დღის განმავლობაში გახდება ცნობილი.

„კლინიკაში ამჟამად 47 პაციენტი წევს. 40 კვლევა გაიგზავნა, 32 უარყოფითი პასუხია მიღებული და 8 კვლევა გრძელდება. ახალი დადასტურებული შემთხვევა ჯერჯერობით არ არის. დამატებით კიდევ 10 პაციენტი შემოვიდა. ღამის განმავლობაში პაციენტების ნაწილი სხვადასხვა კლინიკაში გადაიყვანეს. 8 პაციენტის პასუხი დღის განმავლობაში გახდება ცნობილი, ხოლო ახალი პაციენტების კვლევის პასუხი მოგვიანებით, საღამოს ან ღამით. ამ წუთისთვის მძიმე კატეგორიის პაციენტი კლინიკაში არ გვყავს, საშუალო და მსუბუქი სიმძიმის არიან. კლინიკაში ყველა ასაკობრივი კატეგორიის პაციენტია, გარდა ბავშვებისა“,-აცხადებს ბექაია.