2020-04-21 14:21

რესპუბლიკური საავადმყოფოს დირექტორის, ლევან გოფოძის განცხადებით, კლინიკაში კორონავირუსით ინფიცირებული 39 პაციენტი მკურნალობს.

მისივე თქმით, დაინფიცირებული პაციენტებიდან სამს აქვს შედარებით მძიმე პნევმონია, თუმცა მართვით სუნთქვას არც ერთი მათგანი არ საჭიროებს.

„ამ წუთას კლინიკაში 59 პაციენტია, აქედან 39 არის დადასტურებული კოვიდინფექცია, პაციენტების ზოგადი მდგომარეობა ძირითადად დამაკმაყოფლებელია, სამ პაციენტს აქვს შედარებით მძიმედ მიმდინარე პნევმონია, მაგრამ მართვითი სუნთქვა ჯერჯერობით არც ერთს არ სჭირდება.

გუშინ ინფექციური საავადმყოფოდან იქნა ერთი პაციენტი ჩვენთან გადმოყვანილი კვლევისათვის, დარჩება და ჩვენთან გააგრძელებს მკურნალობას. რაც შეეხება დანარჩენ პაციენტებს, ჩვეულ რეჟიმში ვმუშაობთ, შემოდიან ცხელებით პაციენტები, მათ უტარდებათ კვლევები, ტესტირება და შემდგომში გადადიან სხვა კლინიკაში ან საკარანტინო სივრცეში, გააჩნია, თუ რა შედეგები იქნება.

დღეს ანალიზს ვუღებთ 18 პაციენტს, გარდა ამისა საკარანტინო ზონიდან გადმოვიყვანთ ორ პაციენტს და მათაც ავუღებთ ანალიზს. ნაწილს კი, სწრაფ ტესტს ჩავუტარებთ თვითონ საკარანტინო ზონებში, დაახლოებით 100-მდე ტესტირება გაკეთდება“, - განაცხადა გოფოძემ.

ამასთან, გოფოძის თქმით, კლინიკაში ერთი პაციენტის გამოჯანმრთელებას ელოდებიან.

„ჩვენც გვყავს პაციენტი, რომელსაც ჩაუტარდა რეტესტირება, გავიდა დრო მკურნალობის და ტესტზე ნეგატიური პასუხი მივიღეთ და თუ დღესაც ნეგატიური პასუხი იქნება, რესპუბლიკურ საავადმყოფოს პირველი გამოჯანმრთელებული ეყოლება და გავუშვებთ სახლში“, - განაცხადა გოფოძემ.