ბათუმის კლინიკა „მედალფას“ დირექტორის ალექსი გოხელაშვილის განცხადებით, ამჟამად კლინიკაში 39 პაციენტი იმყოფება, მათ შორის ერთი მძიმე მდგომარეობაშია. როგორც მან ჟურნალისტებს განუცხადა, კლინიკა უკვე დატოვა სამმა გამოჯანმრთელებულმა ადამიანმა და კორონავირუსზე ტესტის შედეგს კიდევ 3 ადამიანი ელოდება.
„ამჟამად არის 39 პაციენტი. გუშინ გამოჯანმრთელებული სამი პაციენტი გაეწერა. დღეს კიდევ სამი პაციენტის პასუხს ველოდებით, სავარაუდოდ, გამოჯანმრთელებაა და მათ სახლში გავუშვებთ. ერთი პაციენტი კრიტიკულ მდგომარეობაშია, დანარჩენი საშუალო და მსუბუქი მიმდინარეობაა“,- აცხადებს ალექსი გოხელაშვილი.
მისი თქმით, გუშინ კლინიკაში ინფექციური საავადმყოფოდან ერთი პაციენტი შეიყვანეს.
„წუხელ, ღამით ინფექციური საავადმყოფოდან ერთი პაციენტი შემოიყვანეს, ის კარანტინიდან გადმოყვანილია“, - აღნიშნავს გოხელაშვილი.
ცნობისთვის, ქვეყანაში კორონავირუსით ინფიცირებულთა რიცხვი 394-ს შეადგენს. მათ შორის 86 გამოჯანმრთელდა. ვირუსის შედეგად 4 ადამიანი გარდაიცვალა.
