კორონავირუსით ინფიცირებული კლინიკა „თიმის“ ორი მედიკოსი რესპუბლიკურ საავადმყოფოში არიან მოთავსებულები.
რესპუბლიკური საავადმყოფოს დირექტორის ლევან გოფოძის განცხადებით, ინფიცირებული პაციენტებიდან ორი კლინიკა „თიმის“ მედპერსონალი, ხოლო ერთი არასრულწლოვანია.
კლინიკაში მოთავსებული კორონავირუსით დაინფიცირებული პაციენტებიდან, არც ერთი მათგანის მდგომარეობა კრიტიკულად მძიმე არ არის. როგორც მან ჟურნალისტეს განუცხადა, რამდენიმე მათგანს აღენიშნება მძიმე პნევმონია, თუმცა ისინი მართვით სუნთქვას არ საჭიროებენ.
„რესპუბლიკურ საავადმყოფოში დაკვირვების ქვეშ იმყოფება 69 პაციენტი, აქედან 29 პაციენტს აქვს დადასტურებულ კოვიდინფექცია. დღეს 2 პაციენტი დაგვემატა. ასევე, გუშინ შემოყვანილი პაციენტებიდან კიდევ 8 პაციენტს დაუდასტურდა ვირუსი და თანდათანობით მატულობს პაციენტების რიცხვი ჩვენთან. არც ერთი მათგანი არ არის კრიტიკულად მძიმე, რამდენიმე მათგანს აღენიშნება მძიმე პნევმონია, თუმცა მართვით სუნთქვას ჯერ არ საჭიროებს. მიმდინარეობს მკურნალობა. დანარჩენი პაციენტები არ არიან მძიმე პაციენტები, თუმცა ინტენსიურ თერაპიას და ინტენსიურ მეთვალყურეობას საჭიროებენ. კორონავირუსით დაინფიცირებულებიდან ერთი გვყავს არასრულწლოვანი, 16 წლისაა. ასევე, დაინფიცირებულებს შორის არის ორი მედიკოსი, კლინიკა „თიმის“ მედიკოსები. მათი მდგომარეობა დამაკმაყოფილებელია. დღეს 21 პაციენტს ჩაუტარდება კიდევ ტესტირება და დაველოდებით მათ პასუხებს“, - განაცხადა გოფოძემ.
