დრო არ ითმენს, ვიმოქმედოთ პრინციპულად!- ამის შესახებ პოლიტიკური გაერთიანება ,,ლელო საქართველოსთვის’’ ლიდერმა მამუკა ხაზარაძემ განაცხადა. მისი თქმით, ქვეყანა რეალური განსაცდელის წინაშე დგას და ამ ვითარებაში დიდი სიფრთხილე და გონიერება მოეთხოვება თითოეულ მოქალაქეს, თუმცა განსაკუთრებული პასუხისმგებლობა ახლა, პირველ რიგში, ხელისუფლებასა და ეკლესიას ეკისრება.
„მთავრობასა და საპატრიარქოს შორის მიღწეული შეთანხმება, ჩვენი ღრმა რწმენით, არ შეესაბამება ჯანდაცვის სისტემის მიერ კორონავირუსთან ბრძოლისათვის შემუშავებულ სტრატეგიასა და სტანდარტებს, სერიოზულ დარტყმას აყენებს ჩვენს სახელმწიფოებრიობასა და კონსტიტუციურ წესრიგს, ვერ თავსდება საგანგებო მდგომარეობის სამართლებრივ ჩარჩოებში და საფრთხეს უქმნის სამოქალაქო თანხმობასა და თანასწორობას. სამწუხაროდ, დღეს ისევ არ ჩანს სახელმწიფოს როლი. ხელისუფლება ისევ ათამაშებს ბურთს სხვის მოედანზე და საკუთარი პასუხისმგებლობის მოქალაქეებზე გადაბარებას ცდილობს. დაუშვებელია ასეთ კრიტიკულ ვითარებაში საჯარო ინსტიტუტების მხრიდან პასუხისმგებლობის მოხსნა და მოქალაქეების მიტოვება რთული სამოქალაქო, სამართლებრივი და აღმსარებლობითი საკითხების გადაწყვეტისას. მოვითხოვთ ხელისუფლებისგან, გამოხატოს საკუთარი მკაფიო პოზიცია, დაასრულოს ბუნდოვანება და გაურკვევლობა, ქვეყნის ორმაგი სტანდარტით მართვა, აიღოს პასუხისმგებლობა კანონის განუხრელ და საყოველთაო დაცვაზე.
სახელმწიფო ვალდებულია, ჩვენი ქვეყნის მოქალაქეების ჯანმრთელობისა და სიცოცხლის დაცვა არ დააყენოს საფრთხის ქვეშ, რადგან პანდემია ეხება ყველას და კანონს უნდა იცავდეს ყველა. დროა, ქვეყანამ იცხოვრებს ერთი კანონით. აქვე მოვუწოდებთ საქართველოს მართლმადიდებელ ეკლესიას, რომელიც ყოველთვის იდგა ადამიანების სულიერი და ფიზკური სიმრთელის სადარაჯოზე, პატივი სცეს კანონს და შეასრულოს აკრძალვა, რომლის მიზანი ჩვენი მცირერიცხოვანი ერის გადარჩენაა და არა რწმენის შეზღუდვა. მოუწოდოს მრევლს სახლში დარჩენისკენ, რათა საკუთარი სახლებიდან ვილოცოთ ჩვენი ქვეყნისთვის. მივესალმები იმ სასულიერო პირთა პოზიციას, ვინც განაცხადა, რომ სახლში დარჩენა არის პანდემიასთან ბრძოლისთვის აუცილებელი ზომა და სააღდგომო ლიტურგია ჩატარდება მრევლის გარეშე. კანონი უზენაესია. ქრისტეს ტაძარი ჩვენს გულშია!“ - განაცხადა მამუკა ხაზარაძემ.
