2020-04-13 20:13

საქართველოში COVID19-ის ინფექციისგან 68-ე პაციენტი განიკურნა. როგორც თბილისის ინფექციური საავადმყოფოს სამედიცინო დირექტორმა მარინა ეზუგბაიამ ჟურნალისტებს განუცხადა დღეს გამოჯანმრთლებული პაციენტი მათ კლინიკაში იყო მოთავსებული, რომელსაც განმეორებითმა ტესტმა ვირუსზე უარყოფითი პასუხი აჩვენა.

მისივე განმარტებით, ასევე დღეს საღამოსვე ტესტის პასუხს ელოდებიან 11 პაციენტტან მიმართებაში. როგორც ეზუგბაიამ აღნიშნა, დღეის მდგომარეობით საქართველოში ახალი კორონავირუსის ახალი შემთხვევა არ დაფიქსირებულა და დაინფიცირებულთა რაოდენობა კვლავ 266 არის.

„არ გვყავს ახალი, დადასტურებული ინფიცირებულები, ყოველშემთხვევაში ვებ-გვერდზე არ დევს. მეც არ მაქვს ჯერჯერობით ინფორმაცია, თუმცა დღეს დილამდე 14 ახალი შემთხვევა იყო და შესაძლებელია, ეს პაციენტები ნაწილდებიან სხვადასხვა კლინიკებში, მაგრამ ამ 14-ის გარდა ახალი შემთხვევები ჯერჯერობით არ გვაქვს. ჩვენ დღეს დილიდან ჩავატარეთ ტესტირება. ერთ პაციენტთან მიმართებით განმეორებით პასუხი უაყოფითი მივიღეთ და დაგვემატა ერთი გამოჯანრთლებული პაციენტი. ჩვენთან ეს უკვე გამოჯანმრთლებულის 45-ე შემთხვევაა, ქვეყნის მასშტაბით კი 68 (გამოჯანმრთლებული)პაციენტი იქნება“, - განაცხადა ეზუგბაიამ

რაც შეეხება სხვა პაცეინტების ჯანმრთელობის მდგომარეობას, რომლებიც თბილისის ინფექციურ კლინიკაში არიან მოთავსებულები, მარინა ეზუგბაიას თქმით, მათი ჯანმრთელობის მდგომარეობა სტაბილურია, ისევ არსებული სიტუაცია აქვთ, რაც დღის განმავლობაში არ შეცვლილა.