2014-03-06 21:43

რუსული სამხედრო ვერტმფრენები დღეს გორის საოკუპაციო ზოლის გარდა აფხაზეთის საოკუპაციო ზოლთანაც გამოჩნდნენ. დღეს, გორისა და კასპის რამდენიმე სოფელში დაახლოებით 12 საათსა და 20 წუთზე ,,მი-8“ ტიპის რუსული სამხედრო ვერტმფრენი გამოჩნდა.

საჰაერო სივრცე დაარღვია რუსულმა უპილოტო საფრენმა აპარატმა აფხაზეთის საოკუპაციო ზოლთანაც.

დაახლოებით 18:22 წუთზე, რუსული უპილოტო საფრენი აპარატი გალის რაიონის სოფელ ნაბაკევის მიმართულებით შემოიჭრა და ზუგდიდის რაიონის სოფელ ხურჩაში განლაგებულ შს სამინისტროს საგუშაგოებს გადაუფრინა.

ორივე ფაქტს საქართველოს საგარეო საქმეთა სამინისტრო ადასტურებს და მომხდართან დაკავშირებით სპეციალურ განცხადებას ავცრცელებს.

სამინისტრო მოუწოდებს ევროკავშირის მონიტორინგის მისიას, ყურადღება გაამახვილონ საოკუპაციო ხაზთან არსებულ ვითარებაზე, რათა აღკვეთილ იქნას რუსეთის მხრიდან პროვოკაციული ქმედებები და ვითარების დაძაბვის მცდელობება.

"2014 წლის 6 მარტს, დაახლოებით 12:20 საათზე, ოკუპირებულ ცხინვალის რეგიონში უკანონოდ განლაგებული "მი-8" ტიპის რუსული სამხედრო ვერტმფრენი შემოიჭრა საქართველოს ცენტრალური ხელისუფლების მიერ კონტროლირებად საჰაერო სივრცეში და გადაუფრინა გორისა და კასპის რაიონების სოფლებს - არბოს, მერეთის, დიცის, კოშკას, ქერეს, ფლავის, ფლავისმანის, ქვეშის, მეჯვრისხევის, ზერტის, კირბალის, ბერშუეთის, წითელუბნის, ხურვალეთის, ზადიაანთკარის, საკორინთლოს, ქვემო ჭალას, პანტიანისა და ვეკეს ტერიტორიაზე განლაგებულ საქართველოს შინაგან საქმეთა სამინისტროს საგუშაგოებსა და პოლიციის შენობებს.

დღესვე, 6 მარტს, დაახლოებით 18:22 საათზე, ოკუპირებულ აფხაზეთში უკანონოდ განლაგებული რუსული უპილოტო საფრენი აპარატი, გალის რაიონის სოფელ ნაბაკევის მიმართულებიდან შემოიჭრა ცენტრალური ხელისუფლების მიერ კონტროლირებად საჰაერო სივრცეში და გადაუფრინა ზუგდიდის რაიონის სოფელ ხურჩაში განლაგებულ შინაგან საქმეთა სამინისტროს საგუშაგოებს.

საქართველოს საგარეო საქმეთა სამინისტრო შეშფოთებას გამოხატავს საქართველოს სუვერენიტეტისა და ტერიტორიული მთლიანობის, ცეცხლის შეწყვეტის შესახებ 2008 წლის 12 აგვისტოს შეთანხმების დარღვევის მორიგი ფაქტის გამო და მოუწოდებს საერთაშორისო თანამეგობრობას, საქართველოში აკრედიტებულ დიპლომატიურ კორპუსსა და საქართველოში ევროკავშირის მონიტორინგის მისიას განსაკუთრებული ყურადღება გაამახვილოს საოკუპაციო ხაზთან არსებულ ვითარებაზე, რათა აღკვეთილ იქნას რუსეთის მხრიდან პროვოკაციული ქმედებები და ვითარების დაძაბვის მცდელობები", - ნათქვამია განცხადებაში.