2014-03-06 21:38

საქართველოს პრემიერმინისტრმა ირაკლი ღარიბაშვილმა, გაიხსენა რა აშშ–ში მისი ვიზიტის დეტალები, აღნიშნა, რომ ქვეყნის პრეზიდენტთან შეხვედრამ უშუალო გარემოში ჩაიარა, ხოლო ამერიკელმა პოლიტიკოსებმა „ბიძინა ივანიშვილის დამსახურებაზე“ ისაუბრეს.

ღარიბაშვილის განცხადებით, მან იცოდა, რომ აშშ ყოველთვის მხარს უჭერდა საქართველოს, მაგრამ „ისინი ერთმნიშვნელოვნად აღნიშნავენ ახალი ხელისუფლების მიერ მიღწეულ წარმატებებს“:

„გადაჭარბების გარეშე, ეს იყო მეგობრული და თბილი გარემო, დიდი კომფორტი იყო ჩემთვის საუბარი პრეზიდენტთან, იყო უშუალო საუბარი, ხუმრობით და ა.შ. ჩემთვის დიდი პატივი იყო, რომ ეს შეხვედრა შედგა, ჩვენ ერთსაათიანი საუბარი გვქონდა, მთელ რიგ საკითხებს შევეხეთ. ვისაუბრეთ უკრაინის კრიზისზეც.

თავად პრეზიდენტმა ობამამ თქვა, რომ აუცილებელია ქვეყნებს შორის ეკონომიკური ურთიერთობების გაღრმავება, ის ნდობა რაც ჩვენს ერებს შორის არსებობს ამ ნდობის რაციონალურად გამოყენებაზეა საუბარი.

განწყობა არის აბსოლუტურად პოზიტიური ჩვენი ქვეყნისა და ხელისუფლების მიმართ. ვიცოდით, რომ ამერიკა ყოველთვის მხარს უჭერდა ქვეყნის სუვერენიტეტს, დემოკრატიულ განვითარებას, მაგრამ ახლა მე ვიგრძენი უპრეცენდენტოდ პოზიტიური განწყობა საქართველოს მიმართ. ისინი ერთმნიშვნელოვნად აღნიშნავენ საქართველოს ახალი ხელისუფლების მიერ მიღწეულ წარმატებებს.

პირველი ის, რომ მოხდა მშვიდ ვითარებაში საპრეზიდენტო არჩევნების ჩატარება, აღნიშნავენ იმასაც, რომ საპარლამენტო არჩევნების შემდეგ ახალი ხელისუფლება იყო და არის ძალიან კონსტრუქციული, აღნიშნავენ ასევე იმას, რომ კოაბიტაციის პერიოდი დადებითად ვმართეთ, ამაში ბიძინა ივანიშვილის დამსახურებასაც აღნიშნავენ და დასძენენ, რომ ბიძინა ივანიშვილის წასვლა პოლიტიკიდან უპრეცენდეტო იყო.

მე მოვისმინე პოლიტიკოსების შეფასება, რომ ეს იყო მართლაც უპრეცედენტო დემოკრატიული სამყაროსთვის“, - განაცხადა ირაკლი ღარიბაშვილმა.