2014-03-06 13:12

„რუსეთში ქართველთა კავშირის“ პრეზიდენტი, მოსკოვში მცხოვრები ბიზნესმენი მიხეილ ხუბუტია მიიჩნევს, რომ სამ ნაწილად დაშლილ საქართელოს „კიდევ უფრო მეტ ნაწილად“ დაშლის საფრთხე ემუქრება, თუკი მოქმედი ხელისუფლება რუსეთისადმი მიდგომას არ შეიცვლის.

ამის შესახებ მიხეილ ხუბუტიას განცხადებაშია ნათქვამი, რომელიც მან ქართულ მედიასაშუალებებს მიაწოდა.

მიხეილ ხუბუტია მიიჩნევს, რომ მოქმედმა ხელისუფლებამ, შერბილებულად, მაგრამ მაინც გაიმეორა რუსეთის მიმართ წინა ხელისუფლებისა და მისი ლიდერის რიტორიკა. ხუბუტია ხელისუფლებას მოუწოდებს, „სხვა ქვეყნის მოიმედედ“ ყოფნას შეეშვას და რუსეთის ხელისუფლებასთან დაუყოვნებლივ დაიწყოს დიალოგი.

„აფხაზეთის ხმა“ მიხეილ ხუბუტიას განცხადებას უცვლელად აქვეყნებს:

„უკრაინაში ბოლო დროს განვითარებულ მოვლენებზე ქართველი პოლიტიკოსების არაადექვატურმა რეაგირებამ კიდევ უფრო გააღრმავა ის დაძაბულობა, რომელიც წინა ხელისუფლების დროს განსაკუთრებულად დამანგრეველი იყო ჩვენი ქვეყნისთვის.

2013 წლის ოქტომბერში ჩატარებული არჩევნების შემდეგ, საქართველოზე მოფიქრალნი და გულშემატკივარნი ვვარაუდობდით, რომ ახალი ხელისუფლება გაანალიზებდა “ნაციონალური მოძრაობისა” და მისი ლიდერის არასწორ ნაბიჯებს მეზობელი რუსეთის მიმართ, რაც გააჩენდა ახალ შესაძლებლობებს დაწყებულიყო გონივრული დიალოგი საქართველოს ტერიტორიული მთლიანობისა და ახალი საგარეო პოლიტიკური კურსისადმი.

სამწუხარო რეალობაა, რომ ახალმა ხელისუფლებამ შერბილებულად, მაგრამ მაინც გაიმეორა წინა ხელისუფლების მანკიერი რიტორიკა რუსეთისადმი, რომელმაც ქვეყანა მიიყვანა სამ ნაწილად დაშლამდე და პერსექტივაში კიდევ უფრო მეტ ნაწილად დაშლის საშიშროებმადე.

დღეს, პოლიტიკოსების რიტორიკა კიდევ უფრო შორს წავიდა და ზოგიერთი მათგანი უკრაინაში ქართული ჯარის გაგზავნასაც კი ითხოვს და ეს მაშინ, როცა დასავლეთიც და რუსეთიც პრობლემის მშვიდობიანი გადაწყვეტისკენ მოუწოდებენ მხარეებს. როგორ ფიქრობთ? არის თუ არა ეს გამოწვევა რუსეთისათვის?!

მე, როგორც რიგირთი ქართველი და იმ საზოგადოების წარმომადგენელი, რომელიც რუსეთში წლებია ცხოვრობს, გული შემტკივა, რომ ახალი ხელისუფლება ხალისით ერთვება „ნაციონალების“ მიერ გაჩაღებულ ურაპატრიოტიზმის დოღში და არ ითვალისწინებს ქვეყნის წინაშე არსებულ რეალურ საფრთხეებს, როდესაც თავისუფლების ლოზუნგისა და სხვა ქვეყნის უსაფუძვლო მოიმედეობის ფონზე, დროშების ქნევით და ფუჭი მუქარებით არის დაკავებული. ამით ისინი უკარგავენ ქვეყანას ყველანაირ პერსექტივას.

ჩემი სურვილია, დღევანდელმა ხელისუფლებამ გაანალიზოს ის ურთულესი გზაგასაყარი, რომელსაც ადგას დღეს საქართველო და გააკეთოს სწორი არჩევანი, რომელიც მომავალ თაობას მისცემს საშუალებას იცხოვროს ერთიან, ძლიერ საქართველოში.

მოვუწოდებ საქართველოს ხელისუფლებას, გამონახოს ყველანაირი გზა და საშუალება დაიწყოს დიალოგი რუსეთის უმაღლეს ხელისუფლებასთან, იმ პრობლემებზე რომელიც ჩვენს ქვეყანას დაუგროვდა ბოლო 20 წლის მანძილზე.

პატივისცემით

მიხეილ ხუბუტია

"ქართველთა კავშირი რუსეთში"

პრეზიდენტი“.