შევჩენკოს რაიონულმა სასამართლომ ყირიმის თვითგამოცხადებული ხელისუფლების, პრემირმინისტრ სერგეი აქსენოვისა და უმაღლესი საბჭოს სპიკერის, ვლადიმირ კონსტანტინოვის დაკავების სანქცია გასცა.
ამის შესახებ ინფორმაციას უკრაინის გენერალური პროკურატურის პრესსამსახური ავრცელებს.
უწყების ცნობით, შესაბამისი გადაწყვეტილება სასამართლომ დღეს მიიღო. „მითითებული პირები უკრაინის უსაფრთხოების სამსახურებმა სასამართლოში ბრალის წარდგენისა და აღკვეთის ღონისძიების შეფარდების მიზნით უნდა მიიყვანონ“, - ნათქვამია განცხადებაში.
გარკვეული დროის წინ, უკრაინის გენერალურმა პროკურატურამ საქმე წამოიწყო აქსენოვის, კონსტანტინოვის, დენის ბერეზოვსკისა და პაველ გუბარევის წინააღმდეგ, უკრაინის სისხლის სამართლის კოდექსის 110-ე მუხლით, რაც ქვეყნის ტერიტორიული მთლიანობის შენარჩუნებაში ხელშეშლას გულისხმობს.
გუშინ კიევის საქალაქო სასამართლომ აქსენოვის ყირიმის პრემირმინისტრად ცნობის ბრძანება და ყირიმის უმაღლესი საბჭოს გადაწყვეტილება, რეფერენდუმის ჩატარებასთან დაკავშირებით ბათილად სცნო.
