2020-03-18 22:26

ოქსფორდის უნივერსიტეტი აცხადებს, რომ შექმნეს ტესტი, რომელიც ვირუსის ქონა-არქონას 30 წუთში ადგენს.

როგორც გამოქვეყნებულ ინფორმაციაში წერია, მეცნიერთა გუნდი, რომელსაც პროფესორები ჟანფენგ ჩუი და ვეი ჰუანგი ხელმძღვანელობენ, მსოფლიოში კორონავირუსის გავრცელების ფონზე ტესტირების მეთოდების გაუმჯობესებაზე მუშაობდნენ.

„ახალი ტესტი ბევრად უფრო სწრაფია და არ საჭიროებს რთულ ინსტრუმენტებს“, — წერია ვებგვერდზე.

„წინა, ფართოდ გავრცელებული ტესტის შედეგისთვის 1,5-2 საათი იყო საჭირო. მკვლევართა გუნდმა შეიმუშავა ახალი ტესტი, დაფუძნებული ტექნიკაზე, რომელსაც შეუძლია შედეგი ნახევარ საათში აჩვენოს“, — ამბობენ ოქსფორდის უნივერსიტეტში

ტესტირების ახალი მეთოდის ყველა ცდა წარმატებული გამოდგა და ახლა მეცნიერები მუშაობენ ისეთი ტესტის შექმნაზე, რომელიც არა მარტო შესაბამის დაწესებულებებში, არამედ სახლის პირობებშიც იმუშავებს.