2014-03-04 13:27

უკრაინაში შექმნილი ვითარების გამო, ამერიკის შეერთებულმა შტატებმა რუსეთის ფედერაციასთან ვაჭრობასთან და ინვესტიციებთან დაკავშირებული ყველა მოლაპარაკება შეაჩერა.

ამის შესახებ ინფორმაციას სააგენტო Reters აშშ-ს სავაჭრო წარმომადგენლობის ოფიციალურ განცხადებაზე დაყრდნობით ავრცელებს.

„ჩვენ შევაჩერეთ ნებისმიერი მოლაპარაკება რუსეთის ფედერაციასთან ორმხრივ ვაჭრობასთან და ინვესტიციებთან დაკავშირებით, რომლებიც მიმართული იყო ორ ქვეყანას შორის უფრო მჭიდრო სავაჭრო და კომერციული ურთიერთობების ჩამოსაყალიბებლად“, - ნათქვამია განცხადებაში.

რამდენიმე დღის წინ პენტაგონმა გაავრცელა ინფორმაცია, რუსეთის ფედერაციასთან სამხედრო თანამშრომლობის შეწყვეტის შესახებ. საუბარია სამხედრო წვრთნებისა და ვიზიტების თაობაზე:

„ჩვენ მოვუწოდებთ რუსეთს უკრაინის კონფლიქტის დეესკალაციისკენ, ყირიმში დისლოცირებულ რუს სამხედროებს კი საკუთარ სამხედრო ბაზებზე დაბრუნებისკენ“, - განაცხადა პენტაგონის წარმომადგენელმა ჯონ კირბიმ.