2014-03-04 01:37

რუსეთის ინიციატივით მოწვეულ გაეროს უშიშროების საბჭოს საგანგებო სხდომაზე გაეროშიო რუსეთის მუდმივმა წარმომადგენელმა ვიტალი ჩურკინმა გაასაჯაროვა ვიქტორ იანუკოვიჩის მოთხოვნა უკრაინაში რუსეთის ჯარის შეყვანის შესახებ.

ჩურკინმა განაცხადა, რომ შესაბამისი თხოვნით იანუკოვიჩმა ვლადიმირ პუტინს პირადად მიმართა.

„როგორც უკრაინის კანონიერად არჩეული პრეზიდენტი, ვაცხადებ: მოვლენები მაიდანზე, ხელისუფლების არაკანონიერი მიტაცება მიანიშნებს იმაზე, რომ უკრაინა სამოქალაქო ომის ზღურბლზე დგას.

ადამიანების სიცოცხლე, უსაფრთხოება და უფლებები უკრაინაში, განსაკუთრებით სამხრეთ-აღმოსავლეთში საფრთხის ქვეშ დგას. დასავლეთის ქვეყნების ხელშეწყობით მიმდინარეობს ღია ტერორი და ძალადობა, ადამიანებს დევნიან პოლიტიკური და ენობრივი ნიშნით.

ამასთან დაკავშირებით მივმართავ რუსეთის პრეზიდენტს ვლადიმირ ვლადიმირის ძე პუტინს თხოვნით, გამოიყენოს რუსეთის შეიარაღებული ძალები კანონიერების, წესრიგის აღსადგენად და უკრაინის მოსახლეობის სტაბილური ცხოვრების დასაცავად“, - ნათქვამია იანუკოვიჩის წერილში, რომელიც მან ვლადიმირ პუტინს გაუგზავნა.