უკრაინის იმ მცხოვრებლებს, ვინც ბოლოდროინდელი მოვლენების გამო საცხოვრებლად რუსეთი აირჩია და უკრაინა დატოვა, ან დატოვებას აპირებს, რუსეთის მთავრობის წევრი შორეულ აღმოსავლეთში გადასახლებას სთავაზობს.
ამის შესახებ განცხადებას რუსული მედია შორეული აღმოსავლეთის განვითარების მინისტრზე ალექსანდრე გალუშკაზე დაყრდნობით ავრცელებს.
მისი თქმით, შორეული აღმოსავლეთი მასშტაბური ინვესტიციების ფონზე უნდა განვითარდეს, თუმცა, ამისთვის შრომითი რესურსები არასაკმარისია. ამ დანაკლისის შევსებას რუსი მინისტრი სწორედ რუსეთში დასახლების მსურველი უკრაინელების ნაკადით ვარაუდობს, თუმცა,ა ცხადებს, რომ ეს ვარიანტი სამინისტროში ჯერ კიდევ იმ მოვლენებამდე განიხილებოდა, რაც ახლა უკრაინაში ვითარდება.
რუსეთის მხარის მონაცემებით, თებერვლის ბოლო ორი კვირის განმავლობაში რუსეთს თავშესაფრის მიცემის თხოვნით უკრაინის 143 ათასმა მოქალაქემ მიმართა. ამჟამად ყველაზე მეტი მიგრაციული აქტივობა უკრაინის მოსაზღვრე რუსულ რეგიონებში: ბელგოროდის, როსტოვის, ბრიანსკის ოლქისა და კრასნოდარის მხარეში შეიმჩნევა.
მაგალითად, 2014 წლის მონაცემების მიხედვით, უკრაინიდან როსტოვის ოლქში მიგრაციული ნაკადი 53%-ით, ხოლო კურსკის ოლქში - 71%-ით გაიზარდა.
