2014-03-03 13:12

რუსეთის "როსსელხოზნადზორის" წარმომადგენლებს ამერიკის შეერთებულ შტატებში ვიზიტზე უარი უთხრეს და განუმარტეს, რომ რუსი ექსპერტების ვიზიტი აშშ-სთვის მიუღებელია.

ამის შესახებ "როსსელხოზნადზორის" მიერ გავრცელებულ განცხადებაშია ნათქვამი, რომელსაც ,,რია ნოვოსტი“ აქვეყნებს.

გავრცელებული ინფორმაციით, 3-6 მარტს, ვაშინგტონში, ყაზახეთის ვაჭრობის მსოფლიო ორგანიზაციაში გაწევრიანების კონტექსტში, ვეტერინარული და ფიტოსანიტარული ღონისძიებების შეთანხმების შესახებ მოლაპარაკებები იმართება, რომელშიც რუსი ექსპერტებიც მონაწილეობდნენ.

"გაფრენამდე ერთი დღით ადრე, ამერიკის შეერთებული შტატების საელჩოდან ელექტრონული ფოსტით შეტყობინება მოვიდა. "როსსელხოზნადზორის" უფროსის მოადგილეს და რუსეთის მხრიდან მოლაპარაკებების ხელმძღვანელს, ნიკოლაი ვლასოვს ტელეფონით აცნობეს, რომ რუსი ექსპერტების ვიზიტი აშშ-სთვის მიუღებელია", - ნათქვამია "როსსელხოზნადზორის" გავრცელებულ ინფორმაციაში.