,,მიუხედავად მაქსიმალური თავშეკავებისა, რასაც ინარჩუნებდა კოაბიტაციის დროს და დღემდე ინარჩუნებს კოალიცია პოლიტიკურად გაკოტრებული ნაცმოძრაობის მიმართ, ამ ადამიანების დემაგოგიას ბოლო არ უჩანს.
-
ამის შესახებ ვიცე პრემიერმა და ენერგეტიკის მინისტრმა კახა კალაძემ „არჩევანში“ განაცხადა და დაამატა, რომ „მათ უტიფარი დემაგოგიური სტილი დაამაკვიდრეს“.
როგორც კალაძემ აღნიშნა, მოვიდა დრო პოლიტიკური გემოვნება გადავიდეს ახალ საფეხურზე. თუმცა მისი თქმით, ძველმა ხელისფულებამ ვერ შეაფასა, თუ რა დემოკრატიული ვითარებაა ქვეყანაში და ვერ ჩამოყალიბდნენ ნორმალურ პარტიად, რომელიც გაუწევდა ოპონირებას მმართველ გუნდს.
კალაძემ აღნიშნა, რომ მისი განცხადება, სადაც ის ყოფილ მმართველ გუნდს აკრიტიკებდა, სამართლიანი იყო. მინისტრი აცხადებს, რომ ისინი ვერ თანამშრომლობენ ოპოზიციასთან, რადგან თუნდაც რუსეთთან მიმართებაში ,,ნაციონალურ მოძრაობას“ აქვს ხისტი პოლიტიკის წარმოების სურვილი.
,,მათი აზრით, ჩვენ უნდა გვქონდეს აგრესიული რიტორიკა რუსეთთან, როგორიც ჰქონდათ მათ 9 წლის განმავლობაში. ხომ დავინახეთ, სად მივგვიყვანა იმ აგრესიულმა რიტორიკამ. აგრესიული რიტორიკა არ არის გამოსავალი.“- განაცხადა კალაძემ.
მისივე თქმით, როდესაც პრემიერი იმყოფებოდა ბრიუსელსა და მიუნჰენში, უცხოელი პარტნიორები სწორედ იმას ურჩევდნენ , რომ, საქართველომ უნდა შესძლოს დიალოგის წარმოება რუსეთთან.
კალაძე ფიქრობს, რომ ოპოზიციას საკმარისი დრო ჰქონდა ბოდიში მოეხადა საზოგადოებისათვის და ნორმალურ პოლტიკურ პარტიად ჩამოყალიბებულიყვნენ, თუმცა, მათ ეს არ გააკეთეს.
მინისტრმა თვითმართველობის არჩევნებზეც ისაუბრა და აღნიშნა, რომ რთული არჩევნები ელოდება კოალიციას, თუმცა ნათლად ჩანს რომ გაიმარჯვებს ,,ქართული ოცნება“.
,,ეს არჩევნები რთული იქნება, სრულიად განსხვავებული იქნება საპარლამენტო და საპრეზიდენტო არჩევნებისგან. დარწმუნებული ვარ ,,ქართული ოცნება“ დადებს მნიშვნელოვან შედეგს, რომელიც ჩვენი გამარჯვებით დასრულდება,“- განაცხადა კალაძემ.
