,,ფრანგულმა სასამართლომ არა მხოლოდ გაამართლა დავით კეზერაშვილი, არამედ ამასთანავე, განაჩენი გამოუტანა ქართულ მართლმსაჯულებას, როგორც პოლიტიკური დევნის იარაღს"- ვანო მერაბიშვილი საფრანგეთისა და საქართველოს სასამართლოების გუშინდელ გადაწყვეტილებებს შორის პარალელს ავლებს.
როგორც მერაბიშვილი აცხადებს, ქართულმა სასამართლომ ზეწოლას ვერ გაუძლო და მის წინააღმდეგ პოლიტიკური განაჩენი გამოიტანა. მისივე თქმით, ის რომ ქვეყანაში ძველი ხელისუფლების წარმომადგენლები პოლიტიკურ დევნას განიცდიან საფრანგეთის სასმართლომ დაადასტურა კეზერაშვილის ექსტრადირებაზე უარის თქმით.
"გუშინ, თბილისის საქალაქო სასამართლომ, მოსამართლე ხათუნა ხარჩილავას სახით, სრული კაპიტულაცია გამოაცხადა ხელისუფლების წინაშე. სამწუხაროდ, მან ვერ გაუძლო ხელისუფლების ზეწოლას და იმავე ხელისუფლების მიერ, წინა წლების განმავლობაში შექმნილ საზოგადოებრივ აზრს და გამოიტანა სრულიად უკანონო და უსამართლო განაჩენი.
აღსანიშნავია, რომ გუშინვე, საფრანგეთში გაიმართა კიდევ ერთი პროცესი ყოფილი ხელისუფლების მაღალი თანამდებობის პირის წინააღმდეგ. ამჯერად უკვე რეალურად დამოუკიდებელმა ფრანგმა მოსამართლემ უარი განაცხადა დავით კეზერაშვილს საქართველოსთვის გადმოცემაზე, ვინაიდან სახეზე იყო პოლიტიკური დევნის ნიშნები და გაათავისუფლა იგი.
ამ გადაწყვეტილებით, ფრანგულმა სასამართლომ არა მხოლოდ გაამართლა დავით კეზერაშვილი, არამედ ამასთანავე განაჩენი გამოუტანა ქართულ მართლმსაჯულებას, როგორც პოლიტიკური დევნის იარაღს", - წერს ექსპრემიერი ვანო მერაბიშვილი.
