2014-02-28 11:21

ამერიკელმა კონგრესმენებმა რესპუბლიკური და დემოკრატიული პარტიიდან, საქართველოს მხარდაჭერის კუთხით ახალი რეზოლუციის პროექტი შეიმუშავეს.

დოკუმენტი შეიცავს მოწოდებას, დაჩქარებულ ტემპებში მოხდეს საქართველოს ნატო-ში გაწევრიანება. ტექსტში ნათქვამია, რომ ამერიკამ უნდა გამოიყენოს ყველანაირი ძალისხმევა იმისთვის, რომ 2014 წელს საქართველოს წარუდგინონ მოქმედების გეგმა ნატოში გაწევრიანებისთვის.

რეზოლუციის პროექტი უკვე გაგზავნილია წარმომადგენელთა პალატაში. რეზოლუციის ავტორებმა დოკუმენტი, აშშ-ში საქართველოს პრემიერ-მინისტრის ვიზიტის დროს ერთობლივ ბრიფინგზე წარადგინეს.

პროექტის ერთ-ერთი ავტორის ტედ პოს განცხადებით, ის იმყოფებოდა საქართველოში და ნახა, რა მდგომარეობაში აღმოჩნდა საქართველო რუსეთის აგრესიის შემდეგ. მისი განცხადებით, საქართველოს ტერიტორიის თითქმის ერთი მესამედი ოკუპირებულია.

პროექტის მეორე ავტორის უილიამ კიტინგის თქმით კი, სოჭის ოლიმპიადის შემდეგ აუცილებელია, რომ აშშ-მა ღია მხარდაჭერა გამოუცხადოს საქართველოს ტერიტორულ მთლიანობას და სუვერენიტეტს. „ნატოში გაწევრიანებას მხარს უჭერს საქართველოს მოსახლეობის თითქმის 80%“-აცხადებს კიტინგი.