რუსეთის საგარეო საქმეთა სამინისტროს განცხადებას, სადაც უწყება საქართველოს ხელისუფლების არასწორ ნაბიჯებზე და ტატუნაშვილი- ოთხოზორიას სიაზე საუბრობს, ქართველი კანონმდებლები ეხმაურებიან.
როგორც საპარლამენტო უმრავლესობა, ისე ოპოზიცია თანხმდება, რომ მოსკოვის გამოხმაურება ნიშნავს ერთ რამეს - თბილისის გადაწყვეტილება ტატუნაშვილი-ოთხოზორიას სიასთან დაკავშირებით სწორი იყო.
მმართველ გუნდში აცხადებენ, რომ აღნიშნული პოლიტიკა გაგრძელდება.
„გასაგებია, რომ რუსეთს არ აქვს პოზიტიური დამოკიდებულება, განსაკუთრებით, როდესაც პოლიტიკურ განცხადებას შეეხება, რომელიც მხარდაჭერილია საერთაშორისო თანამეგობრობის მხრიდან. ახალი ამაში არაფერი არ არის, რუსეთი ყოველთვის დგამს არაკონსტრუქციულ ნაბიჯებს,“-აცხადებს დიმიტრი ცქიტიშვილი.
ტატუნაშვილი-ოთხოზორიას სიაში რუსეთის მოქალაქეების დამატების აუცილებლობაზე საუბრობს „ევროპული საქართველო“.
„ეს კიდევ ერთხელ ადასტურებს როგორი სწორი ნაბიჯი იყო პრინციპულად ოთხოზორია-ტატუნაშვილის სიის მიღება და რომ გასაგრძელებელია ამაზე მუშაობა. გვყავს შესაყვანი არა მარტო მარიონეტული სტრუქტურების წარმომადგენლები, არამედ რუსეთის საოკუპაციო ძალების უშუალო წარმომადგენლები, რომლებიც უშუალოდ ხელს აფარებდნენ ამას,“-აცხადებს გიგა ბოკერია.
სიაში არსებული ხარვეზების მიუხედავად, სწორ ნაბიჯებზე საუბრობენ „ნაციონალურ მოძრაობაშიც“. პარტიაში ამბობენ, რომ საქართველოს ხელისუფლება საერთაშორისო ასპარეზზე უნდა გააქტიურდეს.
„რუსეთი არის ჩვენი დეკლარირებული მტერი. ყველა სწორ ნაბიჯს ის შეაფასებს უარყოფითად და ეს მოსალოდნელია. აუცილებელია, რომ ოკუპანტისგან თავი დავიცვათ პრინციპული პოზიციით. ეს სიაც სწორი გადაწყვეტილებაა, მიუხედავად იმისა, რომ ცუდად არის გაკეთებული და დანარჩენი ყველა საერთაშორისო რადარებზე, საიდანაც ახლა ჩამოვარდნილები ვართ, საქართველოს დაბრუნება,"-ამბობს ნიკა რურუა.
წყარო:რუსთავი2