NDI-ის კვლევის თანახმად, გამოკითხულთა 63%-ს საქართველოსთვის ყველაზე დიდ საფრთხედ რუსეთი მიაჩნია, ეროვნული უსაფრთხოებისთვის ყველაზე დიდ საფრთხედ გამოკითხულთა 53% კი რუსულ ფაქტორებს მიიჩნევს. ეს 7%-ით ნაკლებია წინა წლის დეკემბრის მაჩვენებელზე.
მათგან, ვისაც ეროვნული უსაფრთხოებისთვის ყველაზე დიდ საფრთხედ რუსული ფაქტორები მიაჩნია (53%), ამ ფაქტორებიდან ყველაზე დიდ საფრთხედ რუსულ სამხედრო აგრესიას 33% მიიჩნევს, 11%-ს მიაჩნია, რომ ყველაზე დიდი რუსული საფრთხე აფხაზეთისა და ე.წ. სამხრეთ ოსეთის ოკუპაციაა, 7%-ს კი მიაჩნია, რომ ასეთი რუსული პროპაგანდაა.
ამასთან, მნიშვნელოვნადაა გაზრდილი იმ მოქალაქეთა პროცენტული მაჩვენებელი, ვისაც მიაჩნია, რომ საქართველო ევროკავშირსა და ნატოში უნდა გაწევრიანდეს, ხოლო მათი რიცხვი, ვინც საქართველოს მომავალს პუტინის მიერ დაარსებულ "ევრაზიულ კავშირში" ხედავს, 2017 წლის დეკემბრის მონაცემებთან შედარებით 9%-ითაა შემცირებული:
ორი მოსაზრებიდან: საქართველო უნდა გაწევრიანდეს რუსეთის მიერ დაარსებულ ევრაზიულ კავშირში თუ უნდა გაწევრიანდეს დასავლეთ ევროპის ქვეყნების მიერ დაარსებულ ევროკავშირში, ევროკავშირში გაწევრიანების მოსაზრებას ეთანხმება 65% (5%-ით მეტი წინა, 2017 წლის კვლევასთან შედარებით), რუსეთის დაარსებულ ევრაზიულ კავშირში გაწევრიანებას ეთანხმება 21%, რაც 9%-ით ნაკლებია 2017 წლის კვლევასთან შედარებით.
ამასთან, ნატოში საქართველოს გაწევრიანებას მხარს უჭერს გამოკითხულთა 65%, ხოლო ევროკავშირში საქართველოს გაწევრიანების მომხრეა გამოკითხულთა 75%, რაც 5%-ით მეტია 2017 წლის კვლევის მაჩვენებელზე.