-
2014-02-21 14:49
მარტვილის რაიონის სოფელ ნაგვაზაოში სასტიკად სცემეს „ნაციონალური მოძრაობის“ აქტივისტი გია სურმავა – ინფორმაციას „ნაციონალური მოძრაობის“ მარტვილის ორგანიზაცია ავრცელებს.
გავრცელებული ინფორმაციის მიხედვით, ნაცემი სურმავა „ამ დრომდე იმყოფება მარტვილის საავადმყოფოში – თავის ქალის მოტეხილობა აქვს და ასევე, დაზიანებული აქვს თვალი, რის გამოც არსებობს მხედველობის დაკარგვის საშიშროება.
გავრცელებული ინფორმაციით, მას თავს დაესხა ოთხი ადამიანი, რომლებიც „ქართული ოცნების“ აქტივისტები არიან, მათ შორის ძმები ლაშა და პაატა გაბისონიები. ამის შესახებ დაზარალებულმა უკვე მისცა ჩვენება პოლიციას“.
„აფხაზეთის ხმა“ ინფორმაციის გადამოწმების მიზნით შსს–ს პრესსამსახურს დაუკავშირდა, სადაც განგვიცხადეს, რომ ამ ეტაპზე ვერ ადასტურებენ ინფორმაციას იმის თობაზე, რომ სურმავა სცემეს. შსს–ს ინფორმაციით, სურმავას დაკითხვა ჯერჯერობით ვერ მოხერხდა, რადგან ის ნასვამ მდგომარეობაში იმყოფებოდა. ამასთან, შსს არც გია სურმავას საავადმყოფოში გადაყვანის ფაქტს ადასტურებს.
შენიშვნა: ფოტოილუსტრაცია